मुंबई : गोवा येथे नुकत्याच पार पडलेल्या ५५ व्या आंतरराष्ट्रीय चित्रपट महोत्सवात ‘घरत गणपती’ चित्रपटाचे दिग्दर्शक नवज्योत बांदिवडेकर यांना ‘सर्वोत्कृष्ट पदार्पण दिग्दर्शका’चा पुरस्कार देऊन गौरविण्यात आले.
जागतिक स्तरावर नावाजलेल्या या चित्रपट महोत्सवात देश-विदेशातील अनेक दर्जेदार चित्रपट दाखवण्यात आले. यावेळी बांदिवडेकर यांनी दिग्दर्शित केलेला 'घरत गणपती' चित्रपट प्रदर्शित करण्यात आला. अनेक मराठी आणि अमराठी प्रेक्षकांनी हा चित्रपट पाहून त्याचे कौतुक केले. तसेच चित्रपट क्षेत्रातील दिग्गज मंडळींनीही चित्रपटाबाबत चांगल्या प्रतिक्रिया दिल्या.
तरुण दिग्दर्शक बांदिवडेकर यांचा दिग्दर्शक म्हणून 'घरत गणपती' हा पहिलावहिला चित्रपट जुलै महिन्यात प्रदर्शित झाला होता. या चित्रपटात भूषण प्रधान, निकिता दत्ता, अजिंक्य देव, अश्विनी भावे, संजय मोने, शुभांगी लाटकर, शुभांगी गोखले, डॉ. शरद भुताडिया, सुषमा देशपांडे आणि परी तेलंग आदी कलाकारांनी काम केले आहे. पॅनोरमा स्टुडिओजने या चित्रपटाचे वितरण केले होते. चित्रपटाने बॉक्स ऑफिसवर चांगली कमाई केली होती.
महाराष्ट्राचा लोकोत्सव असणाऱ्या गणपती सणात एकत्र येणाऱ्या कुटुंबाची कथा या चित्रपटात मांडण्यात आली आहे. हा चित्रपट भारतीय संस्कृतीचं आणि परंपरेचं दर्शन घडवत प्रेक्षकांना भावनिक अनुभूती देतो. कौटुंबिक नातेसंबंध, त्यातील हेवेदावे आणि गोडवा तसेच सणाचे महत्त्व सांगणारा हा चित्रपट आहे. श्री.बांदिवडेकर आणि चित्रपटाचे सह-लेखक आलोक सुतार यांच्या लेखणीतून साकारलेल्या या चित्रपटात गणपती उत्सव आणि मराठी संस्कृती, परंपरा यांचे दर्शन प्रेक्षकांना घडले.
बांदिवडेकर यांनी हा पुरस्कार अतुल परचुरे यांना समर्पित केला. चित्रपटात गणपतीसाठी परचुरेंचा आवाज वापरण्यात आला आहे.
नवज्योत हे कोल्हापूर येथील ज्येष्ठ स्वातंत्र्यसैनिक (स्व.) ॲड. विश्वनाथ बांदिवडेकर यांचा वारसा असणाऱ्या परिवारातील सदस्य असून मुंबई उच्च न्यायालयातील ज्येष्ठ विधीज्ञ अॅड. नरेंद्र विश्वनाथ बांदिवडेकर यांचे पुत्र तर मॅटमधील प्रसिद्ध विधीज्ञ ॲड. अरविंद बांदिवडेकर व डॉ. दिलीप बांदिवडेकर (कोल्हापूर) यांचे पुतणे आहेत.
माझ्यासाठी हा अत्यंत आनंदाचा आणि अभिमानाचा क्षण आहे. माझा हा पहिला पुरस्कार असून आंतरराष्ट्रीय महोत्सवात मराठी चित्रपटाला पुरस्कार मिळाला याचा खूप अभिमान वाटतो. मराठी भाषेला आंतरराष्ट्रीय स्तरावर नेतानांच हिंदी प्रेक्षकांनाही आपलेसे कसे करता येईल याचाही विचार सुरू आहे.
- नवज्योत बांदिवडेकर, दिग्दर्शक
