अक्षय कुमारच्या 'ओह माय गॉड २' चित्रपटाची चांगलीच चर्चा सुरु आहे. हा चित्रपट तब्बल ११ वर्षांनंतर प्रदर्शित होणारा आहे.अभिनेता अक्षय कुमार हा महादेवाच्या भूमिकेत दिसणार आहे.या चित्रपटातील लुक व्हायरल झाल्यानंतर त्याच्यावर अनेक प्रतिक्रिया आल्या आहेत. सेन्सॉर बोर्डाने या चित्रपटाच्या रिलीजवर बंदी घातली असल्याची माहिती समोर आली होती. कारण लैंगिक शिक्षणाचे महत्त्व समजावून देणाऱ्या यासिनेमात अभिनेता अक्षय कुमारने भगवान शंकराची भूमिका साकारली असून त्याच्या भूमिकेतील बदल आणि अन्य ३५ दृश्ये वगळण्याची ही मागणी सेन्सॉर बोर्डाने केली होती.
पण याविरोधात बोर्डाकडे फेरविचाराची मागणी करणाऱ्या निर्मात्यांच्या प्रयत्नाला यश आले असून आता या चित्रपटात कुठलीही काटछाट न करता प्रदर्शित होणाऱ्या या सिनेमाला प्रौढांसाठीचा चित्रपट या प्रमाणपत्रावर समाधान मानावे लागले आहे. 'ओह माय गॉड २' हा चित्रपट ११ ऑगस्ट रोजी प्रदर्शित होत आहे.त्याचपूर्वी या चित्रपटाचा टीझर प्रकाशित करण्यात आला होता. हा टीझर पाहिल्यानंतर महाकाळेश्वर मंदिरामधील मुख्य पुजाऱ्यांनी मंदिरात चित्रित झालेली दृश्ये वगळण्यात यावी अशी मागणी केली होती आणि अक्षय कुमारला देवाच्या नाही तर देवदूताच्या भूमिकेत दाखवण्यात यावे अशीही मागणी लोकांकडून आली होती. तसेच सेन्सॉर बोर्डाने या चित्रपटातील जवळपास ३५ दृश्ये काटछाट करण्याची सूचना दिली होती. पण या विरोधामध्ये चित्रपट निर्मात्यांनी सेन्सॉर बोर्डाकडे दाद मागितली होती.
शेवटी या सिनेमाचे फेरपरीक्षण करण्यात आले.फेरपरीक्षण समितीने चित्रपटातील कोणतेही दृश्य काढून टाकण्याची मागणी केली नाही. मात्र चित्रपटात २५ बदल करण्याचे सुचवण्यात आले असून प्रौढांसाठीचा हा चित्रपट आहे हे प्रमाणपत्र कायम ठेवण्यात आले आहे. आजच्या काळामध्ये लैंगिक शिक्षण देणे गरजेचे झाले असून हा चित्रपट त्याच्यावर भाष्य करणारा आहे त्यामुळे हा चित्रपट सगळ्या वयोगटातील लोकांनी पाहायला हवा असे निर्मात्यांचे मत आहे.मात्र आता चित्रपट प्रदर्शनासाठी खूप कमी कालावधी राहिला असून त्यामध्ये काटछाटही मोठ्या प्रमाणात करावी लागली असती त्यामुळे आता हा प्रौढांसाठीचा चित्रपट या प्रमाणपत्रासह पुढे जाण्याचा निर्णय निर्मात्यांनी घेतला आहे.
