बॉलिवूड चित्रपटांमध्ये आपल्या अभिनयाने ठसा उमटवणारा अभिनेता नवाजुद्दीन सिद्दकी आता वेगळ्याच कारणामुळे चर्चेत आला आहे. काही दिवसांपूर्वी नवाजुद्दीन सिद्दकीच्या आईने त्याच्या पत्नीविरोधात पोलिसांकडे तक्रार केली होती. यावरून आता त्याच्या पत्नीने अभिनेता नवाजुद्दीन सिद्दकीवर गंभीर आरोप केले आहेत. तिच्या वकिलाने सांगितले की, "नवाजुद्दीन सिद्दकी त्याची पत्नी आलिया खोलीमध्ये डांबून ठेवले होते. तसेच, नवाझ आणि त्याच्या कुटुंबीयांनी तिला जबरदस्ती घराबाहेर काढण्याचे प्रयत्न केले."
आलियाचे वकील म्हणाले की, "आधी तिला घराबाहेर काढण्याचे प्रयत्न झाले. त्यानंतर तिच्या विरोधात तक्रार दाखल करून तिला अटक करण्याची धमकी दिली. नवाझच्या कुटुंबीयांनी आलियाच्या छळ केला आहे. गेल्या ७ दिवसांपासून तिला जेवण दिलेले नाही. झोपायला बेड आणि अंघोळीसाठी बाथरूमही वापरून दिले नाही. तिच्या खोलीमध्ये सीसीटीव्ही कॅमेरा लावून खोलीबाहेर २४ तास बॉडीगार्ड ठेवण्यात आला होता." पुढे ते म्हणाले की, " अभिनेता नवाजुद्दीन सिद्दकी आणि त्याच्या कुटुंबीयांनी मला आणि माझ्या सहकाऱ्यांना आलियाला भेटता येणार नाही, यासाठीही प्रयत्न केले. तरीही आम्ही कसेबसे तिच्या सह्या मिळवल्या. आता आम्ही त्यांच्याविरोधात तक्रार दाखल करणार आहोत." असे गंभीर आरोप त्याच्यावर करण्यात आले आहेत.
