Marathi Movie Shows Housefull in America: 'गीतरामायणा'ला स्वरसाज देणारे संगीतकार, गायक सुधीर फडके म्हणजेच आपल्या सर्वांचे लाडके बाबूजी. बाबूजींची जीवनगाथा सांगणारा 'स्वरगंधर्व सुधीर फडके' चित्रपट काही दिवसांपूर्वीच प्रदर्शित झाला. श्रीधर फडके, आशा भोसले यांच्यासह चित्रपटसृष्टीतील अनेक मान्यवरांनी या चित्रपटाचे भरभरून कौतुक केले. समीक्षकांनीही 'स्वरगंधर्व सुधीर फडके'ला आपली पसंती दर्शवली. याच दरम्यान परदेशातही या चित्रपटाला उत्तम प्रतिसाद मिळत असल्याचे दिसून येत आहे. अमेरिकेत या चित्रपटाचे आत्तापर्यंत १०० शोज 'हाऊसफुल'च्या दिशेने वाटचाल करत आहेत. या चित्रपटाला अनेकांनी ५ स्टार्स दिले आहेत. हा चित्रपट ग्लोबलीही सुपरहिट झाला आहे. हा चित्रपट एवढ्यातचं न थांबता आता दुबई, लंडन आणि जर्मनीमध्येही प्रदर्शित होणार आहे.
काय म्हणाले दिग्दर्शक?
परदेशात चित्रपटाला मिळालेल्या भरगोस यशाबद्दल दिग्दर्शक योगेश देशपांडे म्हणतात, '' परदेशात चित्रपट प्रदर्शित होण्यापूर्वीच काही शोज हाऊसफुल्ल झाले होते. महाराष्ट्रात बऱ्यापैकी प्रतिसाद मिळत असतानाच परदेशातील प्रेक्षकही इतके प्रेम या चित्रपटावर करत आहेत, हे खरंच भारावणारे आहे. बाबूजी हे नावच इतके मोठे आहे की, त्यांची ख्याती जगभरात पसरलेली आहे. आजही त्यांची गाणी अजरामर आहेत. तरुणाईही त्यांची गाणी तितक्याच आत्मीयतेने ऐकते. चित्रपटाबद्दल अनेकांच्या प्रतिक्रिया येत आहेत. सगळ्याच कलाकारांचे कौतुक होत आहे. एका टीमला यापेक्षा जास्त काय हवे. मी सगळ्याच प्रेक्षकांचा मनापासून आभारी आहे.''
कशी आहे चित्रपटाची टीम?
सौरभ गाडगीळ प्रस्तुत रिडिफाईन प्रॉडक्शन्स निर्मित या चित्रपटाचे सौरभ गाडगीळ आणि योगेश देशपांडे निर्माते आहेत. तर चित्रपटाची कथा, पटकथा, संवाद आणि दिग्दर्शन योगेश देशपांडे यांचे आहे. 'स्वरगंधर्व सुधीर फडके' या चित्रपटात सुनील बर्वे, मृण्मयी देशपांडे, सागर तळाशीकर, मिलिंद फाटक, आदिश वैद्य, सुखदा खांडकेकर, अपूर्वा मोडक, अविनाश नारकर, शरद पोंक्षे, उदय सबनीस, चिन्मय पटवर्धन, निखिल राऊत, विभावरी देशपांडे, धीरेश जोशी, परितोष प्रधान यांच्या प्रमुख भूमिका आहेत.
