पॅरिस : युक्रेनला २६ देशांनी युद्धोत्तर सुरक्षा हमी देण्याचे वचन दिले असल्याचे फ्रान्सचे राष्ट्राध्यक्ष इमॅन्युएल मॅक्रॉन यांनी गुरुवारी जाहीर केले. याअंतर्गत युक्रेनमध्ये आंतरराष्ट्रीय सैन्यही तैनात केले जाईल. 'कोअलिशन ऑफ विलिंग्ज' शिखर परिषदेनंतर पत्रकार परिषदेत मॅक्रॉन यांनी ही माहिती दिली.
या बैठकीला युरोपियन युनियनसह ३५ देशांचे नेते उपस्थित होते. शिखर परिषदेनंतर युक्रेनचे अध्यक्ष झेलेन्स्की यांनीही अमेरिकेचे अध्यक्ष ट्रम्प यांच्याशी संवाद साधला आणि हमीसाठी पाठिंबा मागितला.
भविष्यात कोणताही मोठा हल्ला रोखण्यासाठी यामुळे मदत होईल, असे मॅक्रॉन म्हणाले. युक्रेनियन सैन्याला प्रशिक्षण देणे आणि शस्त्रास्त्रे पुरवणे अशी मदत काही देश युक्रेनच्या बाहेरूनही मदत करणार आहेत. तथापि, मॅक्रॉन यांनी या हमीमध्ये किती सैन्य सहभागी असेल किंवा कोणते देश सहभागी होतील हे स्पष्ट केले नाही.
बर्लिनसारखे काही देश अजूनही निर्णय प्रक्रियेत असल्याने मदत देणाऱ्या देशांची संख्या वाढू शकते असे मॅक्रॉन म्हणाले. अमेरिकेच्या सहभागाबाबत अंतिम निर्णय पुढील काही दिवसांत अपेक्षित आहे.
अमेरिकेचे विशेष दूत स्टीव्ह विटकॉफ यांनी शिखर परिषदेला हजेरी लावली. बैठकीपूर्वी त्यांनी फ्रेंच, ब्रिटिश, जर्मन, इटालियन आणि युक्रेनियन वरिष्ठ राजदूतांची भेट घेतली. युरोपीय अधिकाऱ्यांचे म्हणणे आहे की युक्रेनमध्ये शांतता अजूनही एक दूरचे स्वप्न दिसते, परंतु युद्ध संपल्यानंतरही त्यांना कोणत्याही आपत्कालीन परिस्थितीसाठी तयार राहायचे आहे. त्यांना वाटते की या प्रयत्नातून ते युक्रेनला त्यांच्या पाठिंब्याची खात्री देऊ शकतात. ट्रम्प त्यांच्या निर्णयात त्यांच्यासोबत सहभागी होतील अशीही त्यांना आशा आहे.
