बेलिझ : चाकूचा धाक दाखवून ‘ट्रॉपिक एअर’च्या एका विमानाचे अपहरण करण्याचा प्रयत्न अमेरिकेच्या एका नागरिकाने केल्याची धक्कादायक घटना गुरुवारी बेलिझमध्ये घडली. या घटनेत तीन जण जखमी झाले आहेत. विमान हवेत असतानाच विमानातील एका प्रवाशाने हल्लेखोरावर गोळीबार केला आणि त्यामध्ये हल्लेखोराचा मृत्यू झाल्याची माहिती समोर आली आहे.
‘ट्रॉपिक एअर’चे एक छोटे विमान १४ प्रवाशांना घेऊन जात होते. यावेळी एका अमेरिकन प्रवाशाने अचानक चाकूचा धाक दाखवत विमान हवेत असताना विमानाचा ताबा घेण्याचा प्रयत्न केला. त्याने तीन प्रवाशांवर हल्लाही केला, यात ते जखमी झाले. मात्र, यानंतर विमानातील एका परवानाधारक बंदुक बाळगणाऱ्या प्रवाशाने हल्लेखोरावर गोळी झाडली. यात हल्लेखोर जागीच ठार झाला.
विमानाचे अपहरण करण्याचा प्रयत्न करण्यात आल्यानंतर बराच वेळ हे विमान अवकाशात घिरट्या मारत होते. विमानातील इंधनही संपत आले होते. मात्र, त्यानंतर हे विमान बेलीझमध्ये उतरवण्यात आले. कॅलिफोर्नियातील ४९ वर्षीय हल्लेखोराला हे विमान देशाबाहेर नेण्याची इच्छा होती, त्याने विमानासाठी अधिक इंधनाची मागणीही केली होती.
संशयित हल्लेखोराचे नाव अकिनिएला सावा टेलर (४९) असे असल्याची माहिती समोर आली आहे. तो अमेरिकन नागरिक आहे. दरम्यान, सकाळी ८:३० वाजता सॅन पेड्रोला जाणाऱ्या या विमानात ही घटना घडल्यानंतर फिलिप एसडब्ल्यू गोल्डसन आंतरराष्ट्रीय विमानतळावर आणीबाणीची स्थिती जाहीर करण्यात आली होती. सदर हल्लेखोर विमानात चाकू नेण्यात कसा यशस्वी झाला, यासह अनेक सवाल उपस्थित करण्यात आले आहेत. दरम्यान, या संपूर्ण घटनेची चौकशी करण्यात येणार आहे. तसेच यासाठी बेलिझच्या अधिकाऱ्यांनी या घटनेच्या तपासात मदतीसाठी अमेरिकन दुतावासाशी संपर्क साधल्याचे म्हटले आहे.
