वॉशिंग्टन डीसी : इराणमधील युद्ध आणि राष्ट्राध्यक्ष डोनाल्ड ट्रम्प यांच्या मनमानी धोरणांच्या विरोधात शनिवारी अमेरिकेसह युरोपमध्ये 'नो किंग्स' रॅलींचे आयोजन करण्यात आले होते. या आंदोलनात मोठ्या संख्येने नागरिक सहभागी झाले होते.
अमेरिकेत राष्ट्राध्यक्ष ट्रम्प यांच्या विरोधात झालेल्या ‘नो किंग्स रॅली’मध्ये ८० लाख लोकांनी भाग घेतला. संपूर्ण अमेरिकेतील सर्व ५० राज्यांमध्ये ३,३०० पेक्षा जास्त ठिकाणी हे आंदोलन आयोजित करण्यात आले होते. आयोजकांनी सांगितले की, ऑक्टोबरमध्ये झालेल्या मागील ‘नो किंग्स’ आंदोलनाच्या तुलनेत यावेळी सुमारे १० लाख अधिक लोक सहभागी झाले आणि जवळपास ६०० हून अधिक कार्यक्रम आयोजित करण्यात आले.
ट्रम्प सरकारच्या अनेक धोरणांवर अमेरिकन जनता नाराज आहे. त्यांचा राग विशेषतः इराणसोबत वाढलेला तणाव, कठोर इमिग्रेशन कारवाई आणि वाढत्या महागाईबद्दल आहे. अनेक ठिकाणी लोकांनी ट्रम्प आणि उपराष्ट्राध्यक्ष जेडी व्हान्स यांच्या विरोधात पोस्टर्स दाखवले आणि त्यांना पदावरून हटवण्याची मागणी केली.
मिनेसोटा राज्य आंदोलनाचे केंद्रस्थान
या आंदोलनाचे केंद्रस्थान मिनेसोटा राज्य ठरले. ट्रम्प प्रशासनाच्या आक्रमक इमिग्रेशन अंमलबजावणीला विरोध करण्यासाठी हजारो लोक खांद्याला खांदा लावून उभे होते. सेंट पॉल येथील कॅपिटल लॉनवर झालेल्या मुख्य कार्यक्रमात प्रसिद्ध गायक ‘ब्रूस स्प्रिंगस्टीन’ यांनी हजेरी लावली. हिवाळ्याच्या दिवसातही 'आयसीई' (अमेरिकन सीमा शुल्क आणि इमिग्रेशन अंमलबजावणी) एजंट्सच्या विरोधात रस्त्यावर उतरल्याबद्दल त्यांनी मिनेसोटातील जनतेचे कौतुक केले.
न्यूयॉर्कसारख्या मोठ्या शहरांपासून ते आयडाहोमधील ड्रिग्ससारख्या लहान गावांपर्यंत ही निदर्शने पसरली होती. विशेष म्हणजे, २०२४ च्या निवडणुकीत आयडाहोमध्ये ट्रम्प यांना ६६ टक्के मते मिळाली होती, तरीही तिथे निदर्शने झाली.
व्हाईट हाऊसच्या प्रवक्त्या अबीगेल जॅक्सन यांनी या आंदोलनांना 'डाव्या विचारसरणीच्या नेटवर्क’चा उपक्रम असल्याचे म्हटले. त्यांनी याला ‘ट्रम्प डिरेंजमेंट थेरपी सेशन्स’ असे संबोधले. रिपब्लिकन नॅशनल काँग्रेस कमिटीने या रॅलींना "हेट अमेरिका रॅली" म्हणत टीका केली. मिनेसोटातील मुख्य कार्यक्रमात ब्रूस स्प्रिंगस्टीन यांच्याव्यतिरिक्त अभिनेते रॉबर्ट डी निरो, जेन फोंडा, गायिका जोन बाएज आणि सिनेट सदस्य बर्नी सँडर्स यांसारख्या दिग्गज व्यक्तींनीही पाठिंबा दर्शवला.
शांततापूर्ण निदर्शनांना प्रचंड प्रतिसाद
आयोजकांच्या अंदाजानुसार, जूनमधील रॅलीत ५० लाख आणि ऑक्टोबरमध्ये ७० लाख लोक सहभागी झाले होते. यावेळी ८० लाखांवर लोक या आंदोलनात सहभागी झाले. लॉस एंजेलिस येथे काही निदर्शकांनी सिमेंटचे ठोकळे आणि बाटल्या फेकल्यामुळे पोलिसांनी अश्रुधुराचा वापर केला आणि काहींना अटक केली. टोपेका, कॅन्सास: येथे आंदोलकांनी ट्रम्प यांची 'बेबी' म्हणून आणि 'बेडूक राजा' म्हणून थट्टा करणारे वेश परिधान केले होते.
आंदोलकांच्या विविध मागण्या
केवळ इमिग्रेशनच नाही, तर इराणमधील युद्ध, ट्रान्सजेंडर हक्कांची कपात आणि अब्जाधीशांची आर्थिक मक्तेदारी यांविरुद्धही लोकांनी आवाज उठवला. वॉशिंग्टनमध्ये लोकांनी "मुकुट खाली ठेवा, विदूषका" अशा पाट्या हाती घेतल्या होत्या.
अनेक देशांतही आंदोलने
रोममध्ये हजारो लोकांनी पंतप्रधान जॉर्जिया मेलोनी यांच्या विरोधात आणि इराणमधील युद्धाच्या निषेधार्थ मोर्चा काढला. लंडनमध्येही 'वांशिकवादाच्या विरोधात उभे राहा' अशा घोषणा देत निदर्शने करण्यात आली. पॅरिसमधील बास्टिल येथे जमलेल्या अमेरिकन नागरिकांनी आणि मानवाधिकार संघटनांनी ट्रम्प यांच्या धोरणांचा निषेध केला.
