बीजिंग : चीनचे दोन माजी संरक्षण मंत्री, वेई फेंघे आणि ली शांगफू यांना गुरुवारी एका लष्करी न्यायालयाने भ्रष्टाचाराच्या आरोपाखाली दोन वर्षांच्या सवलतीसह फाशीची शिक्षा सुनावली आहे. पीपल्स लिबरेशन आर्मीच्या उच्च पदस्थ अधिकाऱ्यांवरील ही आतापर्यंतची सर्वात मोठी कारवाई मानली जात आहे. लष्करी न्यायालयाने या दोघांनाही स्वतंत्रपणे ही शिक्षा सुनावली.
वेई आणि ली हे दोघेही राष्ट्राध्यक्ष शी जिनपिंग यांच्या अध्यक्षतेखालील शक्तिशाली 'सेंट्रल मिलिटरी कमिशन' चे माजी सदस्य आणि माजी स्टेट काउन्सिलर होते. ७२ वर्षीय वेई यांना लाच घेतल्याबद्दल, तर ६८ वर्षीय ली यांना लाच घेणे आणि देणे अशा दोन्ही गुन्ह्यांसाठी दोषी ठरवण्यात आले आहे.
हे दोन्ही नेते २०१५ मध्ये शी जिनपिंग यांनी स्थापन केलेल्या शक्तिशाली 'रॉकेट फोर्स'चे प्रमुख होते. रॉकेट फोर्स हे चीनच्या लांब आणि कमी पल्ल्याच्या क्षेपणास्त्रांचे नियंत्रण करते आणि ते चिनी लष्कराचे सर्वात महत्त्वाचे अंग मानले जाते. चीनमध्ये 'दोन वर्षांच्या सवलतीसह फाशी' म्हणजे सहसा दोन वर्षांनंतर या शिक्षेचे रूपांतर आजीवन कारावासात केले जाते. मात्र, या प्रकरणात न्यायालयाने स्पष्ट केले आहे की, आजीवन कारावासात रूपांतर झाल्यानंतरही त्यांना कोणतीही पॅरोल किंवा पुढील सवलत दिली जाणार नाही.
