बीजिंग : रशियाकडून तेल आणि वायू खरेदी करणाऱ्या देशांवर शुल्क किंवा निर्बंध लादण्यासाठी अमेरिकेकडून करण्यात येणाऱ्या कारवाईला चीनने गुरुवारी विरोध केला. इतर देशांशी चीनचे नियमित व्यापार आणि आर्थिक सहकार्य हे कोणत्याही तृतीय देशाच्या हस्तक्षेप अथवा दबावाच्या अधीन असू नये, असे चीनने स्पष्ट केले.
या विधेयकाबाबत विचारले असता चीनच्या परराष्ट्र मंत्रालयाचे प्रवक्ते गुओ जियाकुन यांनी पत्रकार परिषदेत सांगितले की, संयुक्त राष्ट्र सुरक्षा परिषदेची मंजुरी नसलेल्या कोणत्याही कारवाईला चीनचा विरोध आहे.
आंतरराष्ट्रीय कायद्याचा आधार नसलेल्या आणि संयुक्त राष्ट्र सुरक्षा परिषदेची मंजुरी नसलेल्या ‘लाँग-आर्म ज्युरिस्डिक्शन’ला चीन सातत्याने विरोध करतो, असे गुओ यांनी सांगितले.
चीन जगातील विविध देशांशी समानता आणि परस्पर लाभाच्या तत्त्वावर नियमित आर्थिक आणि व्यापार सहकार्य करतो, असेही त्यांनी स्पष्ट केले.
