इस्लामाबाद : पाकिस्तान तहरीक-ए-इन्साफ (पीटीआय) चे संस्थापक आणि पाकिस्तानचे माजी पंतप्रधान इम्रान खान यांची तुरुंगात हत्या झाल्याचे वृत्त सोशल मीडियावर व्हायरल झाल्याने खळबळ उडाली. मात्र, इम्रान खान तुरुंगात सुरक्षित आहेत, असा खुलासा ‘पीटीआय’चे माजी नेते फवाद चौधरी यांनी माध्यमांकडे केला असून त्यांच्या हत्येचे वृत्त सपशेल फेटाळून लावले आहे. यापूर्वीही इम्रान खान यांच्या निधनाच्या आणि हत्येची अफवा पसरवण्यात आली होती. अफगाणिस्तानमधील वृत्तवाहिन्यांनी खोटे वृत्त प्रसारित केले असल्याचे फवाद चौधरी म्हणाले.
एका बाजूला लष्कर त्यांना कोणाची भेटू घेऊ देत नाही आणि दुसऱ्या बाजूला त्यांच्या हत्येचे वृत्त व्हायरल होत आहे. यामुळे पाकिस्तानमध्ये तणाव निर्माण झाला आहे. इम्रान खान यांच्या तिन्ही बहिणी नुरीन खान, अलीमा खान आणि उजमा खान यांनी तुरुंगाबाहेर धरणे आंदोलन सुरू केले आहे. त्यांच्यासोबत काही ‘पीटीआय’ पक्षाचे कार्यकर्तेही होते.
