ह्युस्टन : भारतीय वंशाच्या एका व्यक्तीची पत्नी आणि मुलांसमोरच कुऱ्हाडीने गळ्यावर वार करून शीर धडावेगळे करण्याची धक्कादायक घटना घडली आहे. अमेरिकेतील डल्लास शहरात १० सप्टेंबर रोजी ही निर्घृण हत्या करण्यात आली. चंद्रमौली नागमल्लैया असे हत्या झालेल्या व्यक्तीचे नाव असून याप्रकरणी संशयित आरोपी योर्डानिस कोबोस-मार्टिनेज याला पोलिसांनी अटक केली आहे.
याबाबत मिळालेल्या अधिक माहितीनुसार, चंद्रमौली नागमल्लैया हे ही घटना घडली तेव्हा पत्नी आणि मुलासोबत हॉटेलमध्ये गेले होते. त्यावेळी आरोपी योर्डानिस कोबोस-मार्टिनेज आणि त्याची महिला सहकारीही तेथे होते. यावेळी नागमल्लैया यांनी मार्टिनेज आणि त्याच्या महिला सहकाऱ्याला खराब वॉशिंग मशीनचा वापर न करण्याचा सल्ला दिला. मात्र, ही बाब मार्टिनेज याला सहन झाली नाही.
त्यानंतर आरोपी रागाच्या भरात तणतणत बाहेर आला. त्याने कुऱ्हाड काढून नागमल्लैया चंद्रमौली यांच्यावर हल्ला केला. नागमल्लैया मदतीसाठी पार्किंग एरियाच्या दिशेने पळाले. मात्र, आरोपीने तिथेही त्यांचा पाठलाग केला. त्यावेळी नागमल्लैया यांची पत्नी आणि मुलगा तिथेच होते. त्यांनीही मध्ये पडून नागमल्लैया यांना वाचवण्याचा प्रयत्न केला. मात्र, आरोपीने त्यांना धक्का देऊन बाजूला ढकलले आणि नागमल्लैया यांच्यावर कुऱ्हाडीने घाव घातले. दरम्यान, आरोपीने चंद्रमौली यांच्या कापलेल्या शिरावर दोन वेळा लाथ मारली. त्यानंतर ते डस्टबिनमध्ये फेकून दिले. दरम्यान, त्याच भागात उपस्थित असलेल्या डल्लास फायर रेस्क्यू कर्मचाऱ्याने आरोपीचा पाठलाग करून त्याला पकडले. त्यानंतर पोलिसांनी त्याला अटक केली.
