दुबई (एपी) : अमेरिकेने मांडलेल्या ताज्या युद्धबंदीच्या प्रस्तावाला इराणने पाकिस्तानातील मध्यस्थांमार्फत आपला प्रतिसाद पाठवला आहे. हे युद्ध कायमस्वरूपी थांबवण्यासाठी वाटाघाटींवर भर असावा, अशी भूमिका इराणने घेतल्याचे वृत्त तेथील सरकारी प्रसारमाध्यमांनी रविवारी दिले. लेबनॉनसह सर्व आघाड्यांवरील युद्ध थांबवून सागरी वाहतुकीची सुरक्षा सुनिश्चित करण्याचा इराणचा प्रयत्न असल्याचे सरकारी टीव्हीने म्हटले आहे.
वॉशिंग्टनच्या ताज्या प्रस्तावात युद्ध संपवणे, 'हॉर्मुझची सामुद्रधुनी' पुन्हा खुली करणे आणि इराणचा अणू कार्यक्रम मागे घेणे या मुद्द्यांचा समावेश होता. मात्र, अणू कार्यक्रमाबाबत इराणला नंतर चर्चा करायची आहे. इराणच्या या उत्तरावर व्हाईट हाऊसकडून अद्याप कोणतीही अधिकृत प्रतिक्रिया आलेली नाही. अमेरिकेचे संयुक्त राष्ट्रातील राजदूत माईक वॉल्ट्झ यांनी 'एबीसी'ला सांगितले की, अध्यक्ष डोनाल्ड ट्रम्प पुन्हा संघर्ष सुरू करण्यापूर्वी राजनैतिक मार्गांना सर्व संधी देत आहेत.
दुसरीकडे, रविवारी कतारजवळ एका जहाजाला ड्रोनने लक्ष्य केल्याने युद्धबंदीचा हा प्रयत्न धोक्यात आला आहे. या हल्ल्यामुळे जहाजावर किरकोळ आग लागली. तसेच संयुक्त अरब अमिराती (यूएई) आणि कुवेतने त्यांच्या हवाई हद्दीत ड्रोन घुसल्याची माहिती दिली आहे. या हल्ल्यासाठी 'यूएई'ने इराणला जबाबदार धरले आहे. या घटनांमध्ये कोणतीही जीवितहानी झालेली नाही आणि अद्याप कोणत्याही गटाने या हल्ल्यांची जबाबदारी स्वीकारलेली नाही. कतारच्या परराष्ट्र मंत्रालयाने ही घटना धोकादायक आणि अस्वीकार्य असल्याचे म्हटले असून, यामुळे सागरी व्यापारी मार्ग आणि जीवनावश्यक पुरवठ्याला धोका निर्माण झाल्याचे स्पष्ट केले आहे. २८ फेब्रुवारी रोजी अमेरिका आणि इस्रायलच्या हल्ल्यांनी युद्ध सुरू झाल्यापासून इराण आणि त्यांच्या मित्र गटांनी शेकडो ड्रोन हल्ले केले आहेत.
