टायर : लेबनॉनमध्ये युद्धबंदी लागू झाल्यानंतर काही तासांतच शनिवारी इस्रायलने दक्षिण लेबनॉनवर भीषण हवाई हल्ले केले. या ताज्या हल्ल्यांमध्ये दोन लहान मुलांसह किमान १६ जणांचा मृत्यू झाला आहे. या सातत्यपूर्ण संघर्षामुळे मध्यपूर्वेतील युद्ध संपवण्यासाठी अमेरिका आणि इराण यांच्यात झालेल्या तात्पुरत्या कराराला मोठा धोका निर्माण झाला आहे.
लेबनॉनच्या राष्ट्रीय वृत्तसंस्थेने दिलेल्या माहितीनुसार, इस्त्रायली सैन्याने दक्षिण लेबनॉनमधील नबातीये शहर आणि आसपासच्या गावांना लक्ष्य केले. या हल्ल्यांनंतर कोसळलेल्या ढिगाऱ्यांखाली अद्याप किमान सात जण अडकले असल्याची भीती व्यक्त केली जात आहे. शुक्रवारी दोन्ही बाजूंनी झालेल्या प्रचंड गोळीबारात लेबनॉनमध्ये ४७ जणांचा मृत्यू झाला होता, तर इस्त्रायलचे ४ सैनिक मारले गेले होते. या घटनेनंतर मध्यस्थ दोन्ही देशांमधील संघर्ष थांबवण्यासाठी शर्थीचे प्रयत्न करत आहेत.
क्षेपणास्त्रांचा मारा
अधिकाऱ्याने नाव न सांगण्याच्या इस्रायलच्या लष्करी अटीवर माहिती दिली की, हेझबोलाने रात्रीच्या वेळी दक्षिण लेबनॉनमधील इस्त्रायली सैन्यावर ५० हून अधिक क्षेपणास्त्रे डागली. या चिथावणीनंतर लष्कराने हेझबोलाच्या तळांना लक्ष्य करण्यास सुरुवात केली. इस्त्रायली लष्कराने दावा केला आहे की त्यांनी हेझबोलाचे नियंत्रण कक्ष आणि रॉकेट प्रक्षेपण केंद्रांसह डझनभर तळांवर अचूक हल्ले केले आहेत.
दरम्यान, वॉशिंग्टनमधील इस्रायलचे राजदूत येचिएल लाइटर यांनी एक्सवर म्हटले की, जर हेझबोलाने कराराचा सन्मान केला आणि हल्ले थांबवले, तर इस्रायल तत्काळ युद्धबंदीसाठी पूर्णपणे कटिबद्ध आहे. दुसरीकडे, हेझबोलाने आपण युद्धबंदी पाळण्यास तयार असल्याचे सांगितले, परंतु शुक्रवार रात्री इस्रायलनेच या कराराचे अनेकदा उल्लंघन केल्याचा आरोप केला. हेझबोलाच्या लष्करी शाखेने स्पष्ट केले की ते युद्धबंदीचे पालन करतील, परंतु इस्त्रायली सैन्याकडून होणाऱ्या कोणत्याही हल्ल्याला चोख प्रत्युत्तर दिले जाईल.
गावांवर भीषण हल्ले
दक्षिण लेबनॉनमधील बारिश गावात झालेल्या हल्ल्यात एकाच कुटुंबातील माता-पिता आणि त्यांच्या दोन मुलांसह चार जणांचा मृत्यू झाला. अरब सालीम गावात एका उद्ध्वस्त झालेल्या घरातून मृतदेह बाहेर काढण्यात आला, तर दुवेर आणि कफर रुम्मान गावांमध्ये झालेल्या ड्रोन हल्ल्यात एका मोटारसायकल चालकाचा आणि लेबनॉनच्या एका सैनिकाचा मृत्यू झाला. याशिवाय कन्नारित, सोहमोर आणि शेहोर गावांमध्ये झालेल्या हल्ल्यात ९ जणांना जीव गमवावा लागला आहे.
राजनैतिक चर्चा थांबली
लेबनॉनमधील संघर्ष थांबत नाही तोपर्यंत चर्चा शक्य नाही, अशी भूमिका घेत इराणी अधिकाऱ्यांनी स्वित्झर्लंडचा आपला नियोजित दौरा रद्द केला आहे. अमेरिकेचे उपाध्यक्ष जे. डी. व्हान्स यांनीही आपला दौरा पुढे ढकलला आहे. इराणच्या परराष्ट्र मंत्रालयाचे प्रवक्ते इस्माईल बघाई यांनी सांगितले की, पुढील टप्प्यातील वाटाघाटींसाठी मध्यस्थांमार्फत चर्चा सुरू आहे. हा प्रारंभिक करार डिजिटल पद्धतीने स्वाक्षरीबद्ध झाल्यामुळे स्वित्झर्लंडमधील बैठक तातडीची नव्हती, त्यामुळे आगामी काळात ही बैठक घेतली जाईल.
अमेरिका-इराण करार धोक्यात
चालू आठवड्यात स्वाक्षरी झालेल्या तात्पुरत्या अमेरिका-इराण करारामुळे जागतिक अर्थव्यवस्थेसाठी अत्यंत महत्त्वाचा असलेला आणि इराणने बंद केलेला 'हॉर्मुझची सामुद्रधुनी' हा सागरी मार्ग पुन्हा खुला झाला आहे. या करारामध्ये इराणच्या अणू कार्यक्रमावर पुन्हा चर्चा सुरू करण्याचाही समावेश आहे. विशेष म्हणजे, इस्रायल किंवा हेझबोला यापैकी कोणीही या करारावर स्वाक्षरी केलेली नाही. तरीही या करारामध्ये लेबनॉनमधील लष्करी कारवाया थांबवण्याचे आवाहन करण्यात आले आहे. मात्र, संघर्ष सुरूच राहिल्यामुळे स्वित्झर्लंडमध्ये शुक्रवारपासून सुरू होणारी अमेरिका-इराण चर्चा लांबणीवर पडली आहे. इस्रायलचे पंतप्रधान बेंजामिन नेतन्याहू यांनी जोपर्यंत इस्रायलसमोरील धोका पूर्णपणे नष्ट होत नाही, तोपर्यंत लष्कर दक्षिण लेबनॉनमध्येच राहील अशी भूमिका घेतली आहे. तर इस्रायलने लेबनॉनमधून पूर्णपणे माघार घेतल्याशिवाय हल्ले थांबवणार नाही, असे हेझबोलाने स्पष्ट केले आहे.
