नवी दिल्ली : पंतप्रधान नरेंद्र मोदी यांनी युक्रेनच्या दौऱ्यावरून परतल्यानंतर मंगळवारी रशियाचे अध्यक्ष व्लादिमिर पुतिन यांच्याशी संपर्क साधून त्यांना युक्रेन दौऱ्याबाबतची माहिती दिली. रशिया आणि युक्रेनमधील संघर्षात लवकर आणि शांततापूर्ण मार्गाने तोडगा निघावा यासाठी पाठिंबा देण्यास भारत बांधील आहे, असे मोदी यांनी पुतिन यांना सांगितले.
भारत आणि रशिया यांच्यातील संबंध अधिकाधिक दृढ व्हावेत यासाठीच्या उपाययोजनांवरही पुतिन यांच्यासमवेत चर्चा केल्याचे मोदी यांनी ‘एक्स’वर म्हटले आहे. रशिया-युक्रेन संघर्षाबाबतचा दृष्टिकोन आणि युक्रेन दौऱ्यात आलेला अनुभव याबाबतही पुतिन यांच्याशी चर्चा केली.
