ढाका : बांगलादेशच्या हंगामी सरकारच्या प्रमुखपदी नोबेल पारितोषिक विजेते मुहम्मद युनूस यांची निवड करण्यात आली आहे. बांगलादेशचे अध्यक्ष मोहम्मद शहाबुद्दीन यांनी युनूस यांना गुरुवारी रात्री पद व गोपनीयतेची शपथ दिली. हा कार्यक्रम राष्ट्रपती निवासस्थान असलेल्या ‘बंगभवन’ येथे झाला.
युनूस यांच्याबरोबरच आणखी १३ सदस्यांनी पद व गोपनीयतेची शपथ घेतली. या शपथ समारंभात ४०० जण सहभागी झाले होते. या हंगामी सरकारच्या शपथविधी समारंभात सामील होण्यासाठी भारताला आमंत्रण होते. पंतप्रधान शेख हसीना यांनी राजीनामा दिल्यानंतर अर्थतज्ज्ञ व राजकीय नेते मुहम्मद युनूस यांची हंगामी सरकारच्या प्रमुखपदी नियुक्ती करण्यात आली.
