काठमांडू : काठमांडूचे माजी महापौर आणि रॅपर-राजकारणी अशी ओळख असलेले बालेन शाह (बलेंद्र शाह) यांनी नेपाळचे देशाचे सर्वात तरुण पंतप्रधान म्हणून शुक्रवारी शपथ घेतली. बालेन यांनी आपल्या पक्षाला प्रचंड विजय मिळवून दिला आणि नेपाळमधील दीर्घकाळ चाललेल्या राजकीय घराण्यांचे व पारंपरिक पक्षांचे वर्चस्व संपुष्टात आणले. गुरुवारी राष्ट्रीय स्वतंत्र पक्षाचे संसदीय नेते म्हणून बालेन शाह यांची निवड झाली.
संसदीय पक्षाच्या बैठकीत बालेन यांची एकमताने नेतेपदी निवड करण्यात आली, त्यामुळे ते देशाच्या सर्वोच्च कार्यकारी पदासाठी औपचारिकपणे पात्र ठरले आहेत, असे आरएसपीच्या केंद्रीय संघटन समितीचे सचिव शंकर श्रेष्ठ यांनी सांगितले.
आरएसपीच्या केंद्रीय समितीने शाह यांना त्यांच्या नेतृत्वाखाली मंत्रिमंडळ स्थापन करण्याचे अधिकारही दिले आहेत, असे श्रेष्ठ यांनी सांगितले.
आरएसपीने प्रतिनिधी सभेच्या २७५ पैकी १८२ जागा मिळवून निवडणुकीत विजय मिळवला. भ्रष्टाचारमुक्त शासनाची मागणी करणाऱ्या हिंसक ‘जनरेशन झेड’च्या आंदोलनानंतरच्या पहिल्या सार्वत्रिक निवडणुकीत त्यांनी पक्षांचा पराभव केला.
