सोल : उत्तर कोरियाने या आठवड्यात केलेल्या क्षेपणास्त्र चाचण्यांच्या मालिकेत क्लस्टर-बॉम्ब वारहेड्सने सज्ज असलेल्या बॅलिस्टिक क्षेपणास्त्रांसह अनेक नवीन शस्त्रप्रणालींचे यशस्वी परीक्षण केल्याचा दावा गुरुवारी केला आहे. दक्षिण कोरियाला लक्ष्य करून आपल्या अण्वस्त्र क्षमतांचा विस्तार करण्याच्या धोरणाचा हा एक भाग असल्याचे मानले जात आहे.
उत्तर कोरियाच्या अधिकृत 'कोरियन सेंट्रल न्यूज एजन्सी'ने दिलेल्या माहितीनुसार, सोमवारपासून सुरू झालेली ही चाचणी प्रक्रिया सलग तीन दिवस चालली. क्लस्टर-बॉम्ब वारहेड्स, कमी उंचीवरून मारा करणारी आणि क्षेपणास्त्र संरक्षण यंत्रणेला चकवा देणारी क्षेपणास्त्रे यांचा समावेश होता. विमानविरोधी शस्त्रे शत्रूची विमाने पाडण्यासाठी उपयुक्त असून इलेक्ट्रोमॅग्नेटिक शस्त्रे शत्रूची इलेक्ट्रॉनिक यंत्रणा निकामी करण्यासाठी उपयुक्त आहेत.कार्बन-फायबर बॉम्ब हे वीज पुरवठा खंडित करण्यासाठी वापरले जाणारे विशेष बॉम्ब आहेत.
आंतरराष्ट्रीय प्रतिक्रिया
दक्षिण कोरियाचे लष्करी प्रवक्ते जांग डो-यंग यांनी सांगितले की, या चाचण्यांचे विश्लेषण अमेरिका आणि जपानसोबत मिळून केले जात आहे. जपानच्या संरक्षण मंत्रालयाने स्पष्ट केले की, कोणतीही क्षेपणास्त्रे त्यांच्या विशेष आर्थिक क्षेत्रात कोसळली नाहीत. अमेरिकन लष्कराच्या मते, या चाचण्यांमुळे अमेरिका किंवा त्यांच्या मित्रराष्ट्रांना सध्या कोणताही तात्काळ धोका नाही.
उत्तर कोरियाचे नेते किम जोंग उन यांनी २०१९ पासून अमेरिका आणि दक्षिण कोरियासोबतची राजनैतिक चर्चा थांबवली आहे. उलटपक्षी, त्यांनी रशिया आणि चीनशी जवळीक वाढवण्यावर भर दिला आहे. चीनचे परराष्ट्र मंत्री वांग यी गुरुवारी दोन दिवसांच्या उत्तर कोरिया दौऱ्यावर पोहोचणार आहेत. दुसरीकडे, प्योंगयांगने दक्षिण कोरियाचा उल्लेख "सर्वात मोठा शत्रू देश" असा करत, सोलच्या चर्चेच्या प्रस्तावांची खिल्ली उडवली आहे. नवीन चाचण्यांमुळे कोरियन द्वीपकल्पात तणावाचे वातावरण आहे.
लक्ष्य आणि क्षमता
दक्षिण कोरियाच्या 'जॉइंट चीफ्स ऑफ स्टाफ'ने दिलेल्या माहितीनुसार, बुधवारी डागलेली क्षेपणास्त्रे २४० ते ७०० किमी अंतर पार करून समुद्रात पडली. उत्तर कोरियाच्या दाव्यानुसार, ही क्षेपणास्त्रे 'ह्वासोंग-११' प्रकारची असून ती रशियाच्या इस्कंदर क्षेपणास्त्रांशी साधर्म्य दर्शवतात. या क्षेपणास्त्रांमुळे सुमारे ६.५ ते ७ हेक्टर (१६ ते १७.२ एकर) क्षेत्रातील कोणतेही लक्ष्य पूर्णपणे भस्मसात करण्याची क्षमता असल्याचा दावा प्योंगयांगने केला आहे.
