सेंट पीटर्सबर्ग : भारत आणि रशिया यांच्यातील जुन्या व काळाच्या कसोटीवर उतरलेल्या संबंधांचे कौतुक करत रशियाचे अध्यक्ष व्लादिमीर पुतिन यांनी पाश्चात्त्य देशांना कडक शब्दांत इशारा दिला आहे. भारताने रशियासोबतचे संबंध कमी करावेत यासाठी पंतप्रधान नरेंद्र मोदी यांच्यावर पाश्चात्त्य देशांकडून टाकला जाणारा दबाव जागतिक स्थिरतेला हानी पोहोचवणारा ठरेल, असे पुतिन यांनी म्हटले आहे. तसेच, भारताची आर्थिक प्रगती ही एकाएकी झालेली नसून, ती मोदींच्या नेतृत्वाखालील सरकारच्या कठोर परिश्रमांचे फळ आहे, मोदी दबावासमोर झुकणारे नेते नाहीत, अशी कौतुकाची थापही त्यांनी दिली.
जगातील आघाडीच्या वृत्तसंस्थांच्या प्रमुखांशी संवाद साधताना पुतिन बोलत होते. यावेळी त्यांनी भारताच्या स्वतंत्र परराष्ट्र धोरणाचे विशेष कौतुक केले. रशिया भारतासोबतचे सर्वंकष संबंध वाढवण्यासाठी कटिबद्ध असून, दोन्ही देशांमधील द्विपक्षीय व्यापार सध्याच्या ६० अब्ज डॉलरवरून वार्षिक १०० अब्ज डॉलरवर नेण्याचे उद्दिष्ट असल्याचे त्यांनी स्पष्ट केले.
