अलास्का: अमेरिकेचे अध्यक्ष डोनाल्ड ट्रम्प आणि रशियाचे अध्यक्ष व्लादिमीर पुतिन यांच्यात अलास्का येथे झालेल्या बहुचर्चित भेटीत युक्रेन युद्ध, परस्पर संबंध आणि सहकार्याच्या अनेक मुद्द्यांवर चर्चा झाली. सुमारे तीन तास दोन नेत्यांमध्ये चर्चा झाली, मात्र त्यानंतर दोन्ही नेत्यांनी घेतलेली संयुक्त पत्रकार परिषद फक्त १२ मिनिटे चालली. ज्यामध्ये त्यांनी फक्त पत्रकारांना संबोधित केले, पण कोणत्याही प्रश्नांची उत्तरे दिली नाहीत. या भेटीत कोणताही करार करण्यात आला नाही.
चर्चा आधीच हवी होती
अमेरिकचे अध्यक्ष यजमान म्हणून प्रथम बोलतात, मात्र या परंपरेला छेद देत पुतिन यांनी संयुक्त पत्रकार परिषदेची सुरुवात केली. त्यांनी अमेरिका-रशिया संबंधांच्या स्थितीवर भाष्य करताना म्हटले की, हे संबंध शीतयुद्धानंतरच्या सर्वात खालच्या पातळीवर पोहोचले आहेत. संघर्षाकडून संवादाकडे वळण्याची गरज असल्याचे सांगत पुतिन म्हणाले, कधी ना कधी, आपल्याला ही परिस्थिती सुधारावीच लागेल. ही भेट "खूप आधीच व्हायला हवी होती" असे म्हटले. पुतिन यांच्या मते, त्यांच्या खासगी चर्चेचा मुख्य विषय युक्रेनमधील परिस्थिती हा होता. "युक्रेनियन आणि युरोपियन देश शांतता प्रक्रियेत अडथळा आणणार नाहीत, अशी आशा त्यांनी व्यक्त केली.
पुतिन यांनी ट्रम्प यांच्या "सकारात्मक भूमिकेबद्दल" त्यांचे आभार मानले आणि दोन्ही बाजूंनी प्रत्यक्ष परिणामांवर लक्ष केंद्रित करण्याची गरज असल्याचे नमूद केले. ट्रम्प यांना आपल्या देशाच्या समृद्धीची काळजी आहे, पण रशियाचे स्वतःचे हितसंबंध आहेत हेही ते समजून घेतात. असे सांगत पुतिन यांनी हा संवाद परस्पर आदर आणि वास्तवावर आधारित असल्याचे स्पष्ट केले.
... तर युद्ध झाले नसते
पुतिन यांनी असेही नमूद केले की, आर्क्टिक क्षेत्रात रशिया-अमेरिका सहकार्य शक्य आहे आणि व्यापार-गुंतवणुकीच्या मोठ्या संधी आहेत. त्यांनी दावा केला की, २०२२ मध्ये जर ट्रम्प अमेरिकेचे अध्यक्ष असते, तर हे युद्ध कधीच झाले नसते.
