न्यूयॉर्क/वॉशिंग्टन : अमेरिका रशियाकडून युरेनियम हेक्साफ्लोराइड, पॅलेडियम, खते व रासायनिक पदार्थ आयात करते, याबाबतची माहिती भारतीय माध्यमांनी उघड केल्यानंतर त्याबाबत अमेरिकेचे अध्यक्ष डोनाल्ड ट्रम्प यांनी सावध पवित्रा घेतला. ‘अमेरिका रशियाकडून रासायनिक पदार्थ व खते आयात करीत असल्याबद्दल आपण अनभिज्ञ आहोत, आपण या प्रकरणाचा तपास करू, असे त्यांनी म्हटले आहे.
भारताने रशियाकडून तेल खरेदी करू नये यासाठी ट्रम्प भारतावर दबाव निर्माण करण्याचा प्रयत्न करत आहेत. या पार्श्वभूमीवर ट्रम्प यांना, अमेरिका रशियाकडून आयात करत असलेल्या उत्पादनांवरून प्रश्न विचारण्यात आला. या प्रश्नावर ट्रम्प यांची भंबेरी उडाली व त्यांना याबाबत सारवासारव करावी लागली.
भारतीय माध्यमांनी दावा केला होता की, अमेरिका त्यांच्या आण्विक कार्यक्रमासाठी, इलेक्ट्रिक वाहन उद्योगासाठी रशियाकडून युरेनियम हेक्साफ्लोराइड, पॅलेडियम, खते व रासायनिक पदार्थ आयात करते. त्याबाबत ट्रम्प यांना पत्रकार परिषदेत प्रश्न विचारल्यावर ते गोंधळले व त्यांनी सावध पवित्रा घेत याबाबत माहिती घेऊ, असे सांगितले.
इशारा दिल्यानंतरही भारताने रशियाकडून तेल खरेदी चालू ठेवल्यामुळे पुढील २४ तासांत भारतावर लक्षणीय प्रमाणात आयात शुल्क लादले जाईल, असा इशारा ट्रम्प यांनी मंगळवारी दिला होता. तसेच भारत अमेरिकेवर आकारत असलेले आयात शुल्क जगात सर्वाधिक असल्याच्या आरोपाचाही त्यांनी पुनरुच्चार केला. त्यानंतर भारताने अमेरिका व रशियामधील व्यापारावर बोट ठेवले आहे.
अमेरिकेची जगभरात थट्टा
एकीकडे ट्रम्प भारतासह जगभरातील अनेक देशांना रशियाकडून कोणत्याही प्रकारची आयात करू नका असे सांगत आहेत. तसेच ट्रम्प यांनी रशियाबरोबर व्यापार करणाऱ्या देशांविरोधात टॅरिफ (आयात शुल्क) अस्त्र उगारले आहे. मात्र, अमेरिका रशियाकडून रासायनिक पदार्थ व खते आयात करत असल्याच्या दाव्यामुळे जगभरात अमेरिकेची थट्टा उडवली जात आहे.
