इराणसमवेत येत्या बुधवारपर्यंत व्यापक करार न झाल्यास त्यांच्यासोबतची शस्त्रसंधी संपुष्टात आणली जाऊ शकते आणि दुर्दैवाने आम्हाला पुन्हा बॉम्बहल्ले सुरू करणे भाग पडेल, असा इशारा अमेरिकेचे अध्यक्ष डोनाल्ड ट्रम्प यांनी दिल्याने आखातामध्ये लष्करी संघर्ष पुन्हा एकदा वाढण्याची शक्यता आहे.
अॅरिझोनाच्या फिनिक्स शहरातून वॉशिंग्टनला परतत असताना 'एअर फोर्स वन' विमानातून पत्रकारांशी बोलताना, ट्रम्प यांनी युद्धविराम वाढवण्याबाबत अनिश्चितता दर्शवली. कदाचित मी ती वाढवणार नाही, पण (इराणच्या बंदरांवरील) नाकेबंदी कायम राहणार आहे, असे ट्रम्प म्हणाले. अमेरिका आणि इराण यांच्यातील रखडलेल्या राजनैतिक प्रयत्नांच्या पार्श्वभूमीवर ही टिप्पणी आली आहे.
अमेरिकेने एप्रिलच्या मध्यापासून इराणच्या बंदरांना लक्ष्य करून नौदल नाकेबंदी लागू केली असून, तेहरानशी संबंधित सागरी हालचालींवर निर्बंध घालण्याचा यामागे उद्देश आहे. अमेरिकी अधिकाऱ्यांनी म्हटले आहे की, अंमलबजावणी प्रणालीअंतर्गत इराणी बंदरांमध्ये प्रवेश करण्याचा किंवा बाहेर पडण्याचा प्रयत्न करणाऱ्या जहाजांना परत पाठवण्यात आले आहे. तथापि, इराणने या कृतीचा बेकायदेशीर आणि चिथावणीखोर म्हणून निषेध केला आहे. इराणच्या नेत्यांनीही सामुद्रधुनीच्या स्थितीबाबत आणि व्यापक वाटाघाटींबाबतच्या अमेरिकेच्या दाव्यांना विरोध केला आहे.
तेहरानमधील अधिकाऱ्यांनी असे सुचवले आहे की, नाकेबंदी सुरू राहिल्यास त्याचा होर्मुझमार्गे होणाऱ्या जहाज वाहतुकीवर थेट परिणाम होऊ शकतो, ज्यामुळे पुरवठ्यातील व्यत्ययांमुळे आधीच संवेदनशील असलेल्या जागतिक बाजारपेठांमध्ये चिंता वाढली आहे. दोन्ही पक्ष जाहीरपणे करारासाठी अनुकूलता दर्शवत असले तरी, ट्रम्प यांच्या ताज्या वक्तव्यांमुळे त्यांच्यातील दरी रुंदावत असल्याचे अधोरेखित होते. अमेरिकेच्या अध्यक्षांनी करार होण्याबाबत वारंवार आशावाद व्यक्त केला आहे, त्याच वेळी चर्चा फिसकटल्यास लष्करी परिणामांचा इशाराही दिला आहे.
