नवी दिल्ली : महाराष्ट्रचे देवेंद्र फडणवीस आणि आंध्र प्रदेशचे एन. चंद्राबाबू नायडू यांच्यासह चार मुख्यमंत्री पुढील महिन्यात होणाऱ्या वर्ल्ड इकॉनॉमिक फोरम (डब्ल्यूईएफ) अर्थात जागतिक आर्थिक मंचच्या वार्षिक बैठकीत सहभागी होणार आहेत, तर भारतातील १०० हून अधिक कंपन्यांचे मुख्य कार्यकारी अधिकारी सहभाग घेणार आहेत.
१९ ते २३ जानेवारी २०२६ या पाच दिवसीय वार्षिक बैठकीला अनेक केंद्रीय मंत्रीही उपस्थित राहण्याची शक्यता आहे. या बैठकीत सुमारे १३० देशांमधील जवळपास ३,००० जागतिक नेते सहभागी होणार आहेत, ज्यात सुमारे ६० राष्ट्रप्रमुखांचा समावेश आहे.
महाराष्ट्र आणि आंध्र प्रदेशच्या मुख्यमंत्र्यांसोबत तेलंगणाचे ए. रेवंत रेड्डी आणि मध्य प्रदेशचे मोहन यादव हेही उपस्थित राहणार आहेत. या चार राज्यांव्यतिरिक्त, उत्तर प्रदेशसह आणखी काही राज्यांचीही ‘संवादाची भावना’ या संकल्पनेखाली होणाऱ्या डब्ल्यूईएफ वार्षिक बैठक २०२६ दरम्यान दावोसमध्ये लक्षणीय उपस्थिती अपेक्षित आहे.
या बैठकीला उपस्थित राहणाऱ्या केंद्रीय मंत्र्यांची नावे लवकरच जाहीर होण्याची शक्यता आहे.
जगभरातील श्रीमंत आणि प्रभावशाली व्यक्तींच्या या वार्षिक संमेलनासाठी दावोसमध्ये उपस्थित राहणाऱ्या भारतातील व्यावसायिक नेत्यांमध्ये रिलायन्स इंडस्ट्रीजचे अध्यक्ष आणि व्यवस्थापकीय संचालक मुकेश अंबानी, टाटा समूहाचे एन. चंद्रशेखरन, बजाज समूहाचे संजीव बजाज आणि जुबिलंट भारतीय समूहाचे हरी एस. भारतीय यांचा समावेश आहे.
याशिवाय, ॲक्सिस बँकेचे अमिताभ चौधरी, गोदरेज इंडस्ट्रीज समूहाचे नादिर गोदरेज, जेएसडब्ल्यू समूहाचे सज्जन जिंदाल, झिरोधाचे निखिल कामत, भारती समूहाचे सुनील भारती मित्तल, इन्फोसिसचे सह-संस्थापक नंदन नीलेकणी, इन्फोसिसचे सीईओ सलील एस. पारेख, विप्रोचे रिशाद प्रेमजी, एस्सारचे सीईओ प्रशांत रुईया, पेटीएमचे विजय शेखर शर्मा आणि रिन्यूचे सीईओ सुमंत सिन्हा हे भारतीय कॉर्पोरेट नेतेही उपस्थित राहण्याची शक्यता आहे.
उद्योग आणि अंतर्गत व्यापार प्रोत्साहन विभागाचे सचिव अमरदीप सिंग भाटिया, तसेच गेलचे संदीप कुमार गुप्ता, एसबीआयचे चल्ला श्रीनिवासुलु शेट्टी, एनटीपीसीचे गुरदीप सिंग आणि आरईसीचे जितेंद्र श्रीवास्तव यांच्यासह अनेक सार्वजनिक क्षेत्रातील उपक्रमांचे प्रमुखही उपस्थित राहणार आहेत.
या परिषदेला उपस्थित असलेल्या जागतिक नेत्यांमध्ये जागतिक बँकेचे अध्यक्ष अजय एस. बंगा, आंतरराष्ट्रीय नाणेनिधीच्या व्यवस्थापकीय संचालक क्रिस्टालिना जॉर्जिव्हा, युरोपियन सेंट्रल बँकेच्या अध्यक्षा क्रिस्टीन लागार्ड, युरोपियन आयोगाच्या अध्यक्षा उर्सुला फॉन डेर लेयन, जागतिक आरोग्य संघटनेचे महासंचालक टेड्रोस अधानोम गेब्रेयसस, युनेस्कोचे महासंचालक खालेद एल-एनानी, जागतिक व्यापार संघटनेच्या महासंचालक न्गोझी ओकोंजो-इवेला आणि लंडनचे महापौर सादिक खान यांचा समावेश आहे. ही बैठक पाच जागतिक आव्हानांवर लक्ष केंद्रित करेल.
