खूप प्रयत्न करूनही वजन कमी होत नाही? कच्ची केळी खाऊन पाहा

धावत्या जीवनशैलीत फास्टफूड, जंकफूड खाण्याचे प्रमाण वाढल्याने अनेकांना वजन वाढण्याची समस्या भेडसावते. वजन कमी करण्यासाठी व्यायाम, योगासन यासोबत अनेक उपाय केले जातात. मात्र, धावपळीच्या जीवनशैलीमुळे यामध्ये सातत्य राखणे कठीण होते. तसेच आहार नियमन करण्यासाठी देखील अनेक वेळा मर्यादा येतात. अशा वेळी आपल्याला असे काही उपाय हवे असतात जे आपण आपल्या दैनंदिन कामकाजाच्या वेळेत सहज करू शकतो. त्यामुळे अनेकजण अशा आहाराच्या शोधात असतात ज्यामधून पौष्टिक घटक मिळतील जे सहजरित्या उपलब्धही असेल. कच्ची केळी हा असाच उपाय आहे.

कच्ची केळी वजनावर असे ठेवते नियंत्रण

आपल्या शरीरात जेव्हा अतिरिक्त फॅट वाढत जाते. त्यावेळी आपल्याला वजन वाढीची समस्या जाणवते. केळी हे फायबरयुक्त असतात. त्यामुळे शरीरातील अनावश्यक फॅट बाहेर टाकण्यात मदत होते.

पचनाकरिता सुलभ

वजन वाढीचा संबंध हे खाल्लेले अन्न नीट पचन न होण्यामुळे देखील होते. कच्ची केळी खाल्ल्यामुळे पचन क्रिया सुधारते. पचनक्रिया सुधारल्यामुळे शरीराला अनावश्यक घटक मलावाटे बाहेर फेकले जातात. त्यामुळे वजन कमी होण्यास मदत होते.

भूकेवर ताबा मिळवता येतो

काही वेळा पाचनतंत्र व्यवस्थित असले तरी सातत्याने खात राहण्याची सवय हे देखील वजन वाढीसाठी कारणीभूत ठरते. ज्यावेळी तुम्ही सकाळच्या नाश्त्यामध्ये कच्च्या केळींचा समावेश करतात त्यावेळी यातील फायबरमुळे तुमची भूक नियंत्रणात राहते. परिणामी सातत्याने खात राहण्याऐवजी तुम्ही योग्य वेळी आणि आवश्यकतेनुसार जेवता. परिणामी हळूहळू तुमचे वजन नियंत्रणात येते.

बद्धकोष्ठतेवरही प्रभावी

कच्ची केळी ही पचनक्रिया सुधारण्यासाठी उपयुक्त ठरतात. त्यामुळे बद्धकोष्ठाची समस्या दूर करण्यात देखील कच्च्या केळींचा आहारात समावेश अतिशय फायदेशीर ठरतो.