धाराशिव: एमपीएससी परीक्षार्थी प्रथमेश देशमुख यांच्या आत्महत्येचा उल्लेख कॉकरोच जनता पार्टी (सीजेपी)चे संस्थापक अभिजीत दीपके यांनी गुरुवारी ‘व्यवस्थेने केलेला खून’ असा केला असून, अशा घटना पुन्हा घडणार नाहीत याची खबरदारी शासनाने घ्यावी, असे म्हटले आहे. सरकार तरुणांना दर्जेदार शिक्षण आणि नोकऱ्या देण्यात पूर्णपणे अपयशी ठरल्यामुळेच जनता आरक्षणाची मागणी करत आहेत.
परीक्षांची तयारी करणाऱ्या प्रथमेश देशमुखने पुण्यात आत्महत्या केली. त्याच्यामागे सापडलेल्या चिठ्ठीत त्याच्यावर सुमारे २.५ लाख रुपयांचे कर्ज असल्याचे नमूद केले होते. तो धाराशिवमधील परंडा येथील रहिवासी होता आणि स्पर्धा परीक्षांची तयारी करण्यासाठी नवी पेठ भागात भाड्याने राहत होता.
दीपके यांनी गुरुवारी धाराशिवमधील खासापुरी गावाला भेट देऊन देशमुख यांच्या शोकाकुल कुटुंबीयांची भेट घेतली.
त्यानंतर पत्रकारांशी बोलताना दीपके म्हणाले की, देशमुख नोकरी मिळवून कुटुंबाला गरिबीतून बाहेर काढण्याचे स्वप्न घेऊन पुण्यात गेला होता. पेपर फुटी आणि निकालांमधील विलंबा मुळे विद्यार्थ्यांवर प्रचंड दबाव वाढला. ही व्यवस्थेची चूक आहे आणि हा व्यवस्थेने केलेला खूनच आहे,’ असा आरोप त्यांनी केला.
ग्रामीण भागातील तरुणांची बिकट आर्थिक परिस्थिती, बेरोजगारी आणि व्यवस्थेला कंटाळून प्रथमेशने हे टोकाचे पाऊल उचलले. प्रथमेश पुण्यात राहायचा आणि आर्थिक परिस्थितीमुळे दिवसातून फक्त एकदाच जेवायचा. त्याच्या आईच्या सांगण्यानुसार, प्रथमेश नेहमी म्हणायचा की तो सरकारी गाडीतून घरी येईल, पण दुर्दैवाने काल त्याला रुग्णवाहिकेतून येथे आणावे लागले. त्याच्या वडिलांचे आधीच निधन झाले आहे,’ असे दीपके म्हणाले.
ग्रामीण भागातील एमपीएससी परीक्षार्थींना पुण्यासारख्या शहरात आपला खर्च भागवण्याचे मोठे आव्हान असते. त्याने मित्रांकडून २ ते २.५ लाख रुपये उसने घेतले होते.
एमपीएससी आंदोलनात सहभागी होणार
दीपके यांनी सांगितले की, सीजेपीने यापूर्वी केवळ एमपीएससी परीक्षार्थींच्या आंदोलनाला पाठिंबा दिला होता, परंतु आता ती स्वतः या आंदोलनात सहभागी होणार आहे. सरकारने सतर्क राहिले पाहिजे आणि प्रथमेशच्या सारख्या आत्महत्या पुन्हा घडता कामा नयेत, कारण हे आता सहन केले जाऊ शकत नाही. आतापर्यंत आम्ही आंदोलन करणाऱ्या एमपीएससी परीक्षार्थींना पाठिंबा दिला. पण आज मी जे इथे पाहिले, त्यानंतर अशा घटना पुढे घडतात कामा नयेत. म्हणूनच आम्ही या आंदोलनात प्रत्यक्ष उतरण्याचा निर्णय घेतला आहे.
‘त्याची’ आत्महत्या कर्जामुळेच
पुणे : स्पर्धा परीक्षेचा अभ्यास करताना ऑनलाईन बेटिंगची सवय लागली. या नादातून चार लाखांहून अधिक कर्ज झाले. हे कर्ज कसे फेडायचे, या विवंचनेतून विद्यार्थ्याने गळफास घेऊन आत्महत्या केल्याचे पोलिसांच्या प्राथमिक तपासात समोर आले आहे.
प्रथमेश दिलीप देशमुख असे आत्महत्या केलेल्या विद्यार्थ्याचे नाव आहे. प्रथमेश मागील तीन ते चार वर्षांपासून पुण्यात राहत होता. सदाशिव पेठेतील नंदनवन सोसायटीमध्ये तो वास्तव्यास होता. बुधवारी त्याने राहत्या ठिकाणी गळफास घेऊन आत्महत्या केली होती. आत्महत्या करण्यापूर्वी प्रथमेशने दोन पानी सुसाईड नोट लिहून ठेवली होती. यात त्याने कोणाकडून किती पैसे घेतले होती याची तपशीलवार माहिती दिली होती.
