नाशिक : नाशिकमधील अत्याचार प्रकरणातील मुख्य आरोपी भोंदू अशोक खरात याला कडक पोलीस बंदोबस्तात मंगळवारी राहाता सत्र न्यायालयात हजर करण्यात आले. जमीन खरेदी आणि अवैध सावकारीप्रकरणी शिर्डी पोलिसांनी त्याच्यावर गुन्हा दाखल केला असून, सुरक्षेच्या कारणास्तव आरसीपी तुकडीसह मोठा फौजफाटा तैनात करण्यात आला होता.
या प्रकरणातील गुंतागुंत पाहता, आरोपीने केलेल्या आर्थिक व्यवहारांची सखोल चौकशी करण्यासाठी पोलिसांनी त्याला न्यायालयात हजर केले. तसेच अशोक खरातच्या पोलिस कोठडीत वाढ झाली असून त्याला शनिवार ९ मे पर्यंत पोलिस कोठडीत ठेवण्यात येणार आहे.
सुनावणी दरम्यान सरकारी वकील ॲड. गौरव बोर्डे यांनी जोरदार युक्तिवाद करत आरोपीच्या पोलिस कोठडीची मागणी केली. आरोपीने जमीन खरेदीसाठी लागणारी कोट्यवधींची रक्कम नेमकी कुठून आणली आणि हे व्यवहार कोणाच्या मदतीने केले, याचा शोध घेणे आवश्यक असल्याचे त्यांनी सांगितले.
