नाशिक : महिला लैंगिक शोषण व आर्थिक फसवणूक केल्याप्रकरणी तुरुंगाची हवा खात असलेल्या भोंदू अशोक खरातला सोमवारी न्यायालयाने ७ दिवसांची न्यायालयीन कोठडी सुनावली आहे. दरम्यान, अंमलबजावणी संचालनालयाने (ईडी) सोमवारी खरात आणि त्याच्या सहकाऱ्यांविरुद्ध मनी लाँड्रिंगच्या (पैशांची बेकायदेशीर देवाणघेवाण) चौकशीच्या संदर्भात राज्यभरात अनेक ठिकाणी छापे टाकले.
सूत्रांनी दिलेल्या माहितीनुसार, ६ एप्रिल रोजी नोंदवण्यात आलेल्या अंमलबजावणी प्रकरण माहिती अहवालाच्या आधारे एजन्सीने नाशिक, पुणे, मुंबई आणि शिर्डी येथील १३ ठिकाणी छापे टाकले. नाशिकच्या तृप्ताबाला निवासस्थानीही ईडीने छापेमारी केली आहे. तिथे खरेदी-विक्रीशी संबंधित कागदपत्रांची पडताळणी केली जात आहे. शिर्डी परिसरातील समता पतसंस्थेच्या राहता येथील शाखेत ईडीचे अधिकारी पोहोचले असून तिथे ते अशोक खरात नॉमिनी असलेल्या १०० खात्यांबाबतची चौकशी करत आहेत. या खात्यांमधून तब्बल ६० कोटींहून अधिक रुपयांचा व्यवहार झाल्याची माहिती आहे.
ईडीच्या पथकांनी खरात याच्या नाशिकमधील निवासी मालमत्तेसह, एक फार्महाऊस आणि दोन संस्थात्मक परिसरांमध्ये तपासणी केली. त्यांच्या निवासस्थानी झडती सुरू असताना खरात यांची मुलगी तिथे उपस्थित होती, मात्र त्यांची पत्नी तिथे नव्हती. तसेच, खरात यांच्याशी मालमत्ता व्यवहारांशी संबंधित असलेल्या नाशिकमधील एका नामांकित बिल्डरच्या ठिकाणांवरही छापे टाकण्यात आले.तर पुण्यात एजन्सीने खरात यांचे चार्टर्ड अकाउंटंट प्रकाश पोफळे यांच्याशी संबंधित तीन ठिकाणी झडती घेतली. यात पोफळे यांचे कार्यालय आणि त्यांची मुले ललित आणि हर्षल पोफळे यांच्याशी संबंधित दोन निवासी ठिकाणांचा समावेश आहे.
