मुंबई : गेल्या नऊ दिवसांपासून भूस्खलनामुळे विस्कळीत झालेली मुंबई-पुणे रेल्वे वाहतूक हळूहळू पूर्वपदावर येत आहे. मध्य रेल्वेने कर्जत-लोणावळा घाट विभागातील दुसरी रेल्वे लाईन मंगळवारी रात्री उशिरा पूर्ववत केली आहे. या मार्गदुरुस्तीमुळे गुरुवारपासून पुणे-मुंबई 'डेक्कन क्वीन' आणि 'इंटरसिटी एक्स्प्रेस' पुन्हा आपल्या निर्धारित वेळेनुसार धावणार आहेत.
६ जुलै रोजी झालेल्या जोरदार भूस्खलनामुळे या डोंगराळ भागातील रेल्वे रुळांचे मोठे नुकसान झाले होते. मध्य रेल्वेने दिलेल्या माहितीनुसार, रात्रंदिवस केलेल्या अथक प्रयत्नांनंतर ही लाईन पुन्हा सेवेसाठी सज्ज झाली आहे. १२ पेक्षा जास्त मजूर, अभियंते आणि वरिष्ठ अधिकारी या कामात गुंतले होते. ढिगारा हटवण्यासाठी पोकलेन, जेसीबी, 'युनिमेट' आणि 'ड्यूमॅटिक' ट्रॅक मशिन्ससारख्या अवजड यंत्रसामग्रीचा वापर करण्यात आला.
दुरुस्तीनंतर तीन मालगाड्यांची चाचणी यशस्वीरीत्या पार पडली. त्यानंतर, मंगळवारी रात्री ११:१८ वाजता सुटलेली सीएसएमटी-लातूर एक्स्प्रेस ही या मार्गावरून जाणारी पहिली प्रवासी गाडी ठरली. या गाडीने प्रभावित क्षेत्र २० किमी प्रतितास वेगाने पार करून बुधवारी मध्यरात्री १२:२७ वाजता लोणावळा गाठले.
तिसरी लाईन अद्याप बंदच
सध्या दुसरी लाईन सुरू झाली असली तरी, तिसरी लाईन अद्याप दुरुस्तीच्या प्रतीक्षेत आहे. भूस्खलनामुळे या ट्रॅकचे सर्वाधिक नुकसान झाले असून, दुर्गम भौगोलिक परिस्थितीमुळे येथे दुरुस्तीचे काम पूर्ण होण्यासाठी आणखी काही दिवस लागण्याची शक्यता रेल्वे प्रशासनाने वर्तवली आहे.
