मुंबई : परिपूर्ण समाज घडविण्यासाठी राज्यातील प्रत्येक शाळांमध्ये ‘सीबीएसई पॅटर्न’ लागू करण्यात येणार आहे. शालेय शिक्षण मंत्री दादा भुसे यांनी गुरुवारी विधान परिषदेत ही माहिती दिली. दरम्यान, इंग्रजी शाळांमध्ये मराठी शिकवणेही बंधनकारक करण्यात आल्याचे ते म्हणाले.
राज्यातील शाळांचा शैक्षणिक दर्जा उंचावण्यासाठी शालेय शिक्षण विभागाच्या माध्यमातून विविध उपक्रम राबवण्यात येत आहेत. त्यापैकी एक म्हणजे राज्यातील शाळांमध्ये ‘सीबीएसई पॅटर्न’ लागू करणे. राज्यातील राज्य शिक्षण मंडळांच्या शाळांना ‘सीबीएसई’ अभ्यासक्रम लागू करण्यासंदर्भात सूचना देण्यात आल्या आहेत. विशेष म्हणजे यंदाच्या शैक्षणिक वर्षापासूनच स्टेट बोर्ड शाळेतील विद्यार्थ्यांच्या अभ्यासक्रमात ‘सीबीएसई पॅटर्न’ लागू करण्यात येणार आहे.
शैक्षणिक वर्ष २०२५-२६ या वर्षापासून ‘सीबीएसई पॅटर्न’ लागू होणार असून राज्यातील विद्यार्थ्यांच्या गुणवत्तावाढीवर राज्य सरकारने भर दिला आहे. विशेष म्हणजे यापूर्वी मुख्यमंत्री देवेंद्र फडणवीस यांच्यासमवेत झालेल्या बैठकीनंतर राज्यात ‘सीबीएसई पॅटर्न’ लागू करण्यासंदर्भात आढावा घेतल्याचे भुसे यांनी स्पष्ट केले.
राज्य अभ्यासक्रम आराखड्याला शालेय शिक्षण विभागाशी संबंधित सुकाणू समितीने मान्यता दिली असून मंत्री दादा भुसे यांनी विधान परिषदेतील याबाबतच्या प्रश्नावर लेखी उत्तर देत ही माहिती दिली. भाजप नेते आणि आमदार प्रसाद लाड यांनी याबाबत प्रश्न उपस्थित केला होता. राज्यातील इयत्ता तिसरी ते बारावीच्या शाळांसाठी राष्ट्रीय शैक्षणिक धोरणानुसार केंद्रीय माध्यमिक शिक्षण मंडळाच्या ‘सीबीएसई’ अभ्यासक्रमाच्या आराखड्याला सुकाणू समितीने मान्यता दिली का? असा प्रश्न आमदार प्रसाद लाड यांनी विचारला होता. त्यावर, ‘सीबीएसई’अंतर्गत पाठ्यपुस्तके मराठीत उपलब्ध करून दिली जाणार असून १ एप्रिलपासून याची सुरुवात करण्यात येणार असल्याचे उत्तर दादा भुसे यांनी दिले.
