मालवण : राजकोट येथील छत्रपती शिवाजी महाराजांचा पुतळा कोसळल्याप्रकरणी गुन्हा दाखल असलेला पुतळ्याचा ठेकेदार मुख्य संशयित आरोपी जयदीप आपटे याला शुक्रवारी येथील न्यायालयात हजर केले असता २४ सप्टेंबरपर्यंत न्यायालयीन कोठडी सुनावण्यात आली आहे. त्यानुसार त्याची रवानगी सावंतवाडी येथील कारागृहात करण्यात आली आहे.
दरम्यान न्यायालयीन कोठडीत असलेला बांधकाम रचना सल्लागार चेतन पाटील याने जिल्हा सत्र न्यायालयात जामिनासाठी अर्ज केला होता. यावर आता १९ सप्टेंबर रोजी सुनावणी होणार आहे. त्यामुळे त्याचाही न्यायालयीन कोठडीचा कालावधी वाढला आहे.
राजकोट येथील छत्रपती शिवाजी महाराजांचा पुतळा कोसळल्याची घटना २६ ऑगस्ट,२०२४ रोजी घडली. या प्रकरणातील मुख्य संशयित आरोपी जयदीप आपटे याला पोलिसांनी अटक केली होती. त्याला १३ सप्टेंबरपर्यंत पोलीस कोठडी सुनावण्यात आली होती. शुक्रवारी कोठडीची मुदत संपल्याने पुन्हा न्यायालयात हजर करण्यात आले होते.
