रायगड : रायगड जिल्ह्यातील दिवेआगर समुद्रकिनारी आठ विद्यार्थ्यांचा बुडून मृत्यू झाल्याच्या दुर्घटनेप्रकरणी पोलिसांनी आळंदी येथील विनर्स अकॅडमीचे संस्थापक शिक्षक अमर आडक यांच्यासह पाच जणांविरुद्ध गुन्हा दाखल केला आहे. सहलीचे नियोजन करताना आवश्यक खबरदारी न घेतल्याचा आणि विद्यार्थ्यांच्या सुरक्षेकडे दुर्लक्ष केल्याचा आरोप त्यांच्यावर करण्यात आला आहे.
या प्रकरणात अमर आडक, मृणाल नरसखेडे, सबा महबूब इनामदार, शिल्पा अमर आडक आणि वैष्णवी मृणाल नरसखेडे यांचा समावेश आहे. मृत विद्यार्थी राजवीर वाहिले यांच्या वडिलांनी दिलेल्या तक्रारीच्या आधारे हा गुन्हा दाखल करण्यात आला आहे.
या दुर्घटनेमुळे शैक्षणिक सहलींच्या आयोजनातील सुरक्षिततेचा प्रश्न ऐरणीवर आला आहे. समुद्रकिनारी सहल आयोजित करताना विद्यार्थ्यांवर देखरेख ठेवणे, धोकादायक ठिकाणी जाण्यापासून त्यांना रोखणे आणि आवश्यक सुरक्षा उपाययोजना करणे महत्त्वाचे असते. आठ विद्यार्थ्यांचा मृत्यू झाल्याने परिसरात हळहळ व्यक्त होत आहे.
