मुंबई : राज्यातील काही जिल्ह्यांमध्ये झालेल्या अतिवृष्टीमुळे विविध भागांमध्ये पूरस्थिती निर्माण झाली आहे. या कालावधीत पूरग्रस्त जिल्ह्यांतील शाळांना सुट्टी जाहीर करण्यात आली होती. त्यामुळे अनेक जिल्ह्यांमध्ये शासकीय रेखाकला (एलिमेंटरी व इंटरमिजिएट ड्रॉईंग ग्रेड) परीक्षा पुढे ढकलण्यात आली. या जिल्ह्यांतील विद्यार्थ्यांसाठी परीक्षेचे स्वतंत्र वेळापत्रक जाहीर करण्यात आले आहे. त्यानुसार ही परीक्षा १ ते ५ ऑक्टोबरदरम्यान घेण्यात येणार आहे.
राज्यामध्ये २४ ते २७ सप्टेंबर या कालावधीत शासकीय रेखाकला परीक्षा २०२५ आयोजित करण्यात आली. मात्र या दरम्यान राज्यातील काही जिल्ह्यांमध्ये अतिवृष्टी झाल्याने स्थानिक प्रशासन व जिल्हा आपत्ती व्यवस्थापन प्राधिकरणाने शाळांना सुट्टी जाहीर केली. त्यामुळे पूरग्रस्त जिल्ह्यांमध्ये रेखाकला परीक्षा रद्द करण्यात आली होती. विद्यार्थ्यांचे नुकसान होऊ नये यासाठी महाराष्ट्र राज्य कला शिक्षण मंडळाने पूरग्रस्त जिल्ह्यांतील विद्यार्थ्यांसाठी शासकीय रेखाकला परीक्षेचे नव्याने वेळापत्रक जाहीर केले आहे.
त्यानुसार पूरग्रस्त जिल्ह्यांमध्ये १ ते ५ ऑक्टोबर या कालावधीमध्ये परीक्षा आयोजित केली आहे. नव्या वेळापत्रकानुसार होणाऱ्या परीक्षेसाठी प्रश्नपत्रिका संबंधित केंद्राच्या लॉगइनमध्ये एक दिवस अगोदर उपलब्ध करून देण्यात येईल. परीक्षेसाठी नोंदणी केलेले विद्यार्थी परीक्षेपासून वंचित राहू नये यासाठी सर्व संबंधित शिक्षक, विद्यार्थी, पालक, सहभागी शाळांना सूचना देण्यात यावी, अशा सूचना कला शिक्षण मंडळाने सर्व केंद्रप्रमुखांना दिली आहे.
२४ ते २७ सप्टेंबरदरम्यान झालेल्या परीक्षेतील प्रश्नपत्रिकांचा वापर करण्यात येऊ नये. या प्रश्नपत्रिकांचा वापर झाल्याचे आढळल्यास अशा विद्यार्थ्यांच्या उत्तरपत्रिका रद्द करण्यात येतील. याची सर्व जबाबदारी केंद्रप्रमुखाची असेल, असेही महाराष्ट्र राज्य कला शिक्षण मंडळाकडून स्पष्ट करण्यात आले आहे.
परीक्षेचे वेळापत्रक
१ ऑक्टोबर रोजी सकाळी १०.३० ते दुपारी १ या कालावधीत वस्तुचित्र, तर दुपारी २ ते दुपारी ४ या कालावधीत स्मरणचित्र ही परीक्षा होणार आहे. त्यानंतर ३ ऑक्टोबर रोजी सकाळी १०.३० ते दुपारी १ या कालावधीत संकल्पचित्र - नक्षीकाम आणि दुपारी २ ते दुपारी ४ या कालावधीत कर्तव्यभूमिती व अक्षरलेखन, ४ ऑक्टोबर रोजी सकाळी १०.३० ते दुपारी १ या कालावधीत स्थिरचित्र आणि दुपारी २.३० ते सायंकाळी ४.३० या कालावधीत स्मरणचित्र त्याचप्रमाणे ५ ऑक्टोबर रोजी सकाळी १०.३० ते दुपारी १.३० या कालावधीत संकल्पचित्र नक्षीकाम आणि दुपारी २.३० ते सायंकाळी ५.३० या कालावधीत कर्तव्य भूमिती, घनभूमिती व अक्षरलेखन या विषयाची परीक्षा होणार आहे.
