नागपूर : महिलांच्या सुरक्षिततेसाठी बस, कॅब, टॅक्सी आदी वाहनांत बसवण्यात आलेल्या पॅनिक बटण प्रणालीची राज्यभर परिणामकारता तपासून त्यातील सर्व त्रुटी दूर कराव्यात, असे स्पष्ट निर्देश विधान परिषद उपसभापती डॉ. नीलम गोऱ्हे यांनी शुक्रवारी झालेल्या बैठकीत दिले. प्रत्येक जिल्ह्यात या प्रणालीची नियमित तपासणी करण्यात यावी तसेच तिची अंमलबजावणी अधिक प्रभावी करण्यावर त्यांनी भर दिला.
राज्यात खासगीरित्या धावणाऱ्या टॅक्सी, कॅब आणि बसमधील आपत्कालीन बटण व्यवस्था अनेक ठिकाणी निष्क्रिय असल्याच्या तक्रारींची दखल घेऊन उपसभापती डॉ. नीलम गोऱ्हे यांच्या अध्यक्षतेखाली विधानभवनात संबंधित विभागांची आढावा बैठक घेण्यात आली. या बैठकीला परिवहन आयुक्त विवेक भीमनवार, वाहतूक पोलीस अधीक्षक यशवंत सोळंके, कॅब संघटनेचे प्रतिनिधी केशव क्षीरसागर आणि पत्रकार प्रवीण लोणकर यांसह संबंधित अधिकारी व कर्मचारी उपस्थित होते.
यंत्रणेबाबत व्यापक जनजागृती करा
यंत्रणेबाबत व्यापक जनजागृती व्हावी म्हणून वाहनांत प्रणाली बसवलेल्या ठिकाणी स्पष्ट सूचना लावणे, माहितीपत्रके, जाहिराती आणि विविध माध्यमांतून प्रचार करणे गरजेचे आहे तसेच नागरिकांच्या तक्रारींसाठी व्हॉट्सअॅप क्रमांकही सुरू करा, सूचनाही त्यांनी केली.
दोष आढळल्यास कारवाई
राज्यात एकूण १ लाख ४० हजार ५९९ वाहनांमध्ये पॅनिक बटण प्रणाली बसवण्यात आली असून त्यापैकी १ लाख १ हजार ८६ वाहनांत ही प्रणाली प्रत्यक्षात कार्यरत आहे. उर्वरित वाहनांत यंत्रणा कार्यरत नसल्याचे किंवा मशिन सदोष असल्याचे आढळले आहे. दोष आढळल्यावर संबंधित वाहनचालकांना सूचना देऊन आवश्यक कारवाई करण्यात येत असल्याची माहिती परिवहन आयुक्त भीमनवार यांनी दिली.
मुंबईत सर्वाधिक तक्रारी
मुंबईतील कमांड अँड कंट्रोल सेंटरला आजवर पॅनिक बटण प्रणालीद्वारे ६ लाख ३० हजार २५५ अलर्ट प्राप्त झाले आहेत. प्राप्त तक्रारींवर तत्काळ कार्यवाही होऊन वाहनमालकाला सूचना पाठवली जाते. प्रतिसाद नसल्यास ‘११२’ वर माहिती देण्यात येते. फिटनेस प्रमाणपत्रासाठी वाहनांची तपासणी होताना पॅनिक बटण प्रणाली बसवणे अनिवार्य असल्याचेही त्यांनी सांगितले.
