मुंबई : धाराशिव जिल्ह्यातील श्री तुळजाभवानी मंदिर देवस्थान इनाम जमिनीच्या गैरव्यवहाराची चौकशी करण्यासाठी पुणे विभागीय आयुक्तांच्या अध्यक्षतेखाली समिती स्थापन करण्यात आली.
अहिल्यानगर आणि सोलापूरचे जिल्हाधिकारी हे या समितीचे सदस्य आहेत. या समितीला अहवाल सादर करण्यासाठी एक महिन्याची मुदत देण्यात आली आहे. महसूल आणि वन विभागाने सोमवारी यासंदर्भातील शासन निर्णय जारी केला.
नुकत्याच पार पडलेल्या राज्य विधिमंडळाच्या पावसाळी अधिवेशनात विधानसभेत तुळजाभवानी देवस्थान इनाम जमिनीच्या गैरव्यवहाराचा मुद्दा उपस्थित झाला होता. त्यावेळी या गैरव्यवहाराची चौकशी करण्याचे आश्वासन सरकारने दिले होते. त्यानुसार ही समिती स्थापन करण्यात आली आहे.
तुळजाभवानी मंदिराला ४ हजार ८२० एकर जमीन निजामाकडून देणगी म्हणून आली. सदर जमिनीची खरेदी-विक्री होऊ शकत नाही. असे असतानासुद्धा महसूल विभागाचे अधिकारी आणि कर्मचारी यांच्या संगनमताने खासगी व्यक्तींना तिचे वाटप करण्यात आले. देवस्थानच्या नावे ३ हजार ३९७ एकर जमीन असताना प्रत्यक्ष जमिनीचा ताबा मात्र काही खासगी व्यक्तींच्या नावे देण्यात आला, असा आरोप आहे.
