लासलगाव : नाशिक जिल्ह्यातील लासलगावसह प्रमुख बाजार समित्यामधील चांगल्या प्रतीच्या कांद्याचा घाऊक दर गेल्या महिन्यातील किलोला ५५ रुपये वरून ४६ रुपयांपर्यंत खाली आला आहे.
गेल्या तीन दिवसात कमाल दरात ५८९ रुपये घाऊक बाजारातील दर घसरले असतानाही शहरी किरकोळ बाजारात ग्राहकांना ६५ रुपये किलो मोजावे लागत आहे. कर्नाटक आणि आंध्र प्रदेशात नवीन कांद्याची आवक वाढत असल्यामुळे राज्यातील कांदा बाजारावर दबाव निर्माण झाला असल्याचे बोलले जात आहे.
कर्नाटक आणि आंध्र प्रदेशातील खरीप कांद्याची काढणी ऑगस्ट अखेरपासून सुरू झाली आहे. आता तेथील बाजारपेठांमध्ये आवक वाढत आहे. नवीन व ताजा कांदा उपलब्ध झाल्यामुळे व्यापारी तसेच निर्यातदारांकडून या कांद्याला पसंती मिळत आहे. परिणामी, नाशिकच्या कांद्याच्या मागणीवर परिणाम झाला असून, घाऊक दरात घसरण होत आहे.
कर्नाटकातील बाजारपेठेत कांद्याला ३५ ते ५१ रुपये किलो दर मिळत असल्यामुळे नाशिकच्या कांद्याच्या दरावरही त्याचा परिणाम होत आहे.
दिवाळीपर्यंत चढउतार
खरीप कांद्याची आवक विविध राज्यांत वाढती असली, तरी उत्पादनावर हवामानाचा परिणाम झाला आहे. आगामी काळात आवक, निर्यात आणि देशांतर्गत मागणी यावर कांद्याच्या दराचे गणित अवलंबून राहणार आहे दिवाळीपर्यंत बाजारात चढ-उतार कायम राहण्याची शक्यता आहे.
