मुंबई : लोणावळा-कर्जत रेल्वे मार्गावर ६ जुलैला झालेल्या मुसळधार पावसामुळे अनेक ठिकाणी दरडी कोसळल्याने रेल्वे वाहतुकीवर मोठा परिणाम झाला आहे. सध्या दुरुस्त करण्यात आलेल्या एकाच मार्गावरून रेल्वे वाहतूक सुरू असून दुसरा मार्ग पूर्ववत करण्याचे काम युद्धपातळीवर सुरू आहे. या पार्श्वभूमीवर, मध्य रेल्वेने ११ ते १७ जुलै या कालावधीत अनेक मेल-एक्स्प्रेस गाड्यांचे मार्ग बदलणे तसेच काही गाड्या शॉर्ट टर्मिनेट आणि शॉर्ट ओरिजिनेट करण्याचा निर्णय घेतला आहे.
प्रवाशांना अल्पसूचनेवर होणाऱ्या बदलांमुळे गैरसोय होऊ नये आणि त्यांना प्रवासाचे नियोजन करता यावे, यासाठी हा निर्णय घेण्यात आला आहे.
यानुसार विशाखापट्टणम-मदुराई-एलटीटी, एलटीटी, कराईकल-एलटीटी, एमजीआर चेन्नई-एकतानगर, चेन्नई-अहमदाबाद, सिकंदराबाद-राजकोट, राजकोट-कोइम्बतूर, पोरबंदर-सिकंदराबाद, एमजीआर पुणे-संतरागाछी, संतरागाछी-पुणे आदी अनेक गाड्या दौंड-मनमाड-इगतपुरी-कल्याण तसेच दौंड-मनमाड-जळगाव-पाळधी-सुरत आणि इतर पर्यायी मार्गांवरून वळवण्यात आल्या आहेत.
