मुंबई : पर्यटकांचे आकर्षण असलेल्या महाबळेश्वर पाचगणीतील वाहतूककोंडी फोडण्यासाठी योग्य तो निधी उपलब्ध करून द्या. तसेच याठिकाणी येणाऱ्या पर्यटकांसाठी पार्किंगची सुविधा उपलब्ध करून द्या. यासाठी आवश्यक निधी उपलब्ध करून देण्याचा निर्णय उपमुख्यमंत्री एकनाथ शिंदे यांनी घेतला आहे.
महाबळेश्वर पाचगणीतील समस्या येथील कामांची झाडाझडती एकनाथ शिंदे यांनी सातारा जिल्ह्यातील दरे गावी आपल्या निवासस्थानी संबंधित अधिकाऱ्यांची बैठक घेतली. महाबळेश्वर पाचगणीतील वाहतूककोंडीची समस्या दिवसेंदिवस वाढत आहे. याठिकाणी पार्किंगची मोठी समस्या निर्माण झाली आहे. नागपूर येथील हिवाळी अधिवेशन संपताच उपमुख्यमंत्री एकनाथ शिंदे विश्रांती घेण्यासाठी सध्या सातारा जिल्ह्यातील दरे या त्यांच्या मूळगावी गेले आहेत. तिथे गेले दोन दिवस आराम केल्यानंतर मंगळवारपासून एकनाथ शिंदे पुन्हा एकदा ॲक्शन मोडवर आले असून त्यांनी कामाला सुरुवात केली. दरम्यान, आपल्या दरे येथील निवासस्थानी त्यांनी मंगळवारी महाबळेश्वर आणि पाचगणी नगर परिषदांचे मुख्याधिकारी व दोन्ही नगरपरिषदांची आढावा बैठक घेतली. यावेळी या दोन्ही नगर परिषदांना भेडसावणाऱ्या विविध प्रश्नांवर प्रामुख्याने चर्चा करण्यात आली.
महाबळेश्वर आणि पाचगणी या दोन्ही पर्यटनस्थळांवर नाताळ आणि नववर्षाच्या स्वागतासाठी मोठ्या प्रमाणावर पर्यटक येतात. यावेळी घाटातील रस्ते अरुंद असल्याने इथे वारंवार मोठी वाहतूककोंडी होते. त्यामुळे पर्यटकांना वाहतूककोंडीचा सामना करावा लागतो. यावर उपाययोजना करण्यासाठी आवश्यक ते उपाय करण्याच्या सूचना शिंदे यांनी दिल्या. तसेच येणाऱ्या वाहनांना पुरेसे पार्किंग उपलब्ध व्हावेत, यासाठी नव्याने पार्किंग लॉट तयार करावे, शक्य असेल तिथे एलिव्हेटेड पार्किंगचा प्रकल्प राबवावा अशी सूचना त्यांनी केली.
यावेळी महाबळेश्वर नगरपरिषदेचे मुख्याधिकारी योगेश पाटील, पाचगणी नगरपरिषदेचे मुख्याधिकारी निखिल जाधव आणि महाबळेश्वर पोलीस स्थानकाचे पोलीस निरीक्षक बी.पी. सांडभोर आणि अन्य अधिकारी उपस्थित होते.पर्यटकांना आकर्षित करणारे प्रकल्प राबवा!
इथे पर्यटनासाठी येणाऱ्या पर्यटकांना योग्य त्या सुविधा देताना त्यांना सौजन्यपूर्ण वागणूक मिळेल याकडे विशेष लक्ष द्यावे असेही सांगितले. तसेच येथे येणाऱ्या पर्यटकांना वारंवार इथे यावेसे वाटावे यासाठी त्यांना आकर्षित करण्यासाठी काही नाविन्यपूर्ण प्रकल्पही राबवावे अशी सूचना त्यांनी केली. यासाठी लागणारा निधी नगरविकास विभागाच्या माध्यमातून देण्याच्या सूचना शिंदे यांनी दिल्या असून या दोन्ही नगरपरिषदांना लागेल तो निधी तत्काळ देण्यास त्यांनी या बैठकीत मान्यता दिली.
