महाड : नगरपरिषद आणि नगरपंचायतीच्या मतदानादरम्यान आमदार भरत गोगावले आणि खासदार सुनील तटकरे यांच्या समर्थकांमध्ये महाड येथे झालेल्या राड्याप्रकरणी गोगावलेंचे पुत्र विकास गोगावले, महेश गोगावले आणि विजय मालुसरे यांच्यासह ८ जणांवर २१ विविध कलमांखाली गुन्हे दाखल करण्यात आले आहेत. या घटनेमुळे राजकीय वर्तुळात खळबळ उडाली आहे.
मंगळवारी रात्री उशिरा हा गुन्हा महाड तालुका पोलीस ठाण्यात दाखल करून तपासाकरिता महाड शहर पोलिसांकडे वर्ग करण्यात आला आहे. या प्रकरणी अद्याप कोणालाही अटक करण्यात आलेली नाही. त्याचबरोबर मतदान पार पडल्यानंतर ईव्हीएम मशीनसह मतदान यंत्रकक्षाची पूजा केल्याबद्दल वडगाव मावळ पोलिसांनी भाजपच्या उमेदवार ॲड मृणाल गुलाबराव म्हाळसकर, राष्ट्रवादीच्या उमेदवार अबोली मयुर ढोरे आणि माजी नगराध्यक्ष मयूर ढोरे या तीन जणांवर गुन्हा दाखल केला आहे.
