पुणे : महाराष्ट्र राज्य माध्यमिक आणि उच्च माध्यमिक मंडळाच्या वतीने फेब्रुवारी आणि मार्च महिन्यात घेण्यात आलेल्या इयत्ता बारावी आणि दहावी परीक्षांच्या आतापर्यंत ८५ टक्के उत्तरपत्रिका तपासून पूर्ण झाल्या असून दहावी आणि बारावीचा निकाल ५ जूनपूर्वी लागण्याची शक्यता आहे.
सर्व शाळांनी विद्यार्थ्यांच्या प्रात्यक्षिक परीक्षेचे गुण ऑनलाईन माध्यमातून बोर्डाकडे पाठवले आहेत. दरवर्षी जून महिन्याच्या पहिल्या आठवड्यात बारावीचा निकाल लागतो, तर जून महिन्याच्या दुसऱ्या आठवड्यात दहावीचा निकाल जाहीर होतो. मात्र, यावर्षी दोन्ही वर्गाचे निकाल ५ जूनपूर्वी लागण्याची शक्यता माध्यमिक आणि उच्च माध्यमिक मंडळाच्या अधिकाऱ्यांकडून वर्तवली जात आहे.
