पुणे : राज्यात अनेक ठिकाणी किमान तापमान सातत्याने खाली येत असल्याने महाराष्ट्रात थंडीची लाट येणार असल्याचा इशारा भारतीय हवामान विभागाने दिला आहे. अनेक जिल्ह्यांसाठी अलर्ट जारी केला असून, १० डिसेंबरपासून थंडी आणखी तीव्र होईल असा इशारा दिला आहे. पुढील काही दिवस राज्यात गारठा कायम राहण्याची शक्यता हवामान विभागाने वर्तवली आहे. दरम्यान, या हंगामातील सर्वाधिक कमी तापमान धुळे जिल्ह्यात ५ अंश सेल्सिअस इतके मंगळवारी नोंदवले गेले.
विदर्भामध्ये तापमान ९° सेल्सिअसपर्यंत खाली घसरले असून, विदर्भात थंडीची लाट कायम असल्याने गोंदिया, नागपूर आणि वर्धा जिल्ह्यांसाठी ‘यलो अलर्ट’ जारी करण्यात आला आहे. नागपूरमध्ये कमाल २९ सेल्सिअस आणि किमान ९ सेल्सिअस तापमानाची नोंद होण्याची शक्यता आहे. याव्यतिरिक्त, विदर्भातील इतर जिल्ह्यांमध्येही तापमानात लक्षणीय घट दिसून येत आहे.
उत्तर महाराष्ट्रात सर्वात मोठी घट उत्तर महाराष्ट्रात तापमानात सर्वाधिक घट दिसून येत आहे. नाशिक शहरात कमाल २८° सेल्सिअस आणि किमान १०° सेल्सिअस तापमान राहण्याचा अंदाज असून, येथेही १० डिसेंबरपासून थंडीची लाट तीव्र होणार आहे.
पश्चिम महाराष्ट्राचे प्रतिनिधित्व करणाऱ्या पुणे शहरात कमाल २७ सेल्सिअस आणि किमान ११ सेल्सिअस तापमान नोंदवले जाऊ शकते, आणि पुढील काही दिवसांत या भागातही तीव्र थंडीची लाट येण्याची शक्यता आहे.
मुंबई आणि मराठवाड्याची स्थिती मुंबईत देखील तापमानात हळूहळू घट दिसून येत आहे, जिथे कमाल तापमान ३३ सेल्सीयस आणि किमान १६ सेल्सिअसच्या आसपास राहण्याचा अंदाज आहे. कोकण प्रदेशातही तापमानात घट नोंदवली जात आहे. दुसरीकडे, मराठवाड्यात थंडीची स्थिती स्थिर आहे. छत्रपती संभाजीनगर येथे कमाल २८°C आणि किमान ९°C दरम्यान तापमान राहण्याची शक्यता असून, आकाश निरभ्र राहील. डिसेंबरच्या दुसऱ्या आठवड्यात महाराष्ट्राला तीव्र थंडीच्या स्थितीचा सामना करावा लागेल असा अंदाज हवामान शास्त्रज्ञांनी वर्तवला आहे.
