मुंबई : मतदार नोंदणी, मतदारांची माहिती गोळा करणे, मतदानादिवशी मतदार केंद्रावर उपस्थित राहणे अशी महत्त्वाची भूमिका मतदान केंद्रीय अधिकारी पार पाडतात. मात्र त्यांना मिळणारे मानधन तुटपुंजे असल्याने मानधनात वाढ करण्याचा निर्णय राज्य सरकारने घेतला आहे.
राज्य सरकारच्या या निर्णयामुळे राज्यातील मतदान केंद्रीय अधिकारी व पर्यवेक्षक यांना मोठा दिलासा मिळाला आहे. आगामी स्थानिक स्वराज्य संस्थांच्या निवडणुका लक्षात घेत हा निर्णय घेण्यात आला आहे.
याबाबत सोमवारी शासन निर्णय जारी करण्यात आला आहे. राज्यातील सर्व विधानसभा मतदारसंघाच्या छायाचित्र मतदार याद्यांची विश्वसनीयता सुनिश्चित होण्यासाठी भारत निवडणूक आयोगाच्या आदेशानुसार प्रत्येक मतदान केंद्रासाठी मतदान केंद्रस्तरीय अधिकाऱ्यांच्या नियुक्त्या करण्यात आल्या आहेत. तसेच महाराष्ट्र राज्यातील सर्व विधानसभा मतदारसंघाच्या छायचित्र मतदार याद्यांची विश्वसनीयता सुनिश्चित होण्यासाठी भारत निवडणूक आयोगाच्या आदेशानुसार प्रत्येक मतदान केंद्रासाठी मतदान केंद्रस्तरीय अधिकारी यांची नेमणूक झाली आहे. प्रत्येक १० मतदान केंद्रस्तरीय अधिकारी यांच्या कामकाजाचे देखरेख व मुल्यमापन करण्यासाठी एका पर्यवेक्षकांची नेमणूक करण्यात आलेली आहे.
किती मिळत होते?
मतदान केंद्रीय अधिकारी यांना ६ हजार रुपये मानधन मिळत होते. तर पर्यवेक्षक यांना १२ हजार रुपये मानधन मिळत होते. मात्र आता राज्य सरकारने यांच्या मानधनात वाढ करण्याचा निर्णय घेतला आहे.
किती मिळणार?
मतदान केंद्रीय अधिकाऱ्यांना आता ६ हजार ऐवजी १२ हजार रुपये मानधन मिळणार आहे. तर मतदान केंद्रस्तरीय अधिकारी पर्यवेक्षक यांना १२ हजार रुपये ऐवजी १८ हजार रुपये मानधन मिळणार आहे.
मतदान केंद्रीय अधिकाऱ्यांची नेमकी जबाबदारी काय?
-मतदार नोंदणी ही सतत चालणारी प्रक्रिया आहे व यामध्ये मतदान केंद्रस्तरीय अधिकारी यांची महत्वाची भूमिका आहे.
-मतदान केंद्रस्तरीय अधिकाऱ्यांव्दारे मतदार यादीच्या पुनरीक्षण कार्यक्रमांतर्गत मतदार नोंदणीची विशेष मोहीम राबविणे, विशिष्ट संवर्गाच्या मतदारांची नोंदणी यासाठी घरोघरी जाऊन मतदार नोंदणी करणे तसेच वेळोवेळी आयोगाच्या निर्देशानुसार मतदारांची विशेष माहिती गोळा करणे आदी काम करण्यात येतात.
-छायाचित्र मतदार याद्यांची प्रतवारी सुधारण्यासाठी व त्या संपूर्णतः अचूक होण्यासाठी मतदार नोंदणी अधिकारी यांना सहाय्य करणे, मतदारांना मतदार चिठ्ठी वाटप करणे व मतदानाच्या दिवशी मतदान केंद्रावर उपस्थित राहणे आदी काम ही मतदान केंद्रस्तरीय अधिकारी करीत असतात.
-हे काम ते त्यांच्या मूळ कार्यालयातील काम सांभाळूनही अतिरिक्त जबाबदारी म्हणून पार पाडावी लागतात.
