मुंबई : भीमाशंकर, त्र्यंबकेश्वर, वैजनाथ तीर्थक्षेत्र अशा राज्यातील पाच ज्योतिर्लिंगांचा विकास करण्यात येणार आहे. यासाठी ८८१ कोटी ८९ लाख रुपयांच्या कामांना मंजुरी देण्यात आली आहे. राज्यातील पाच ज्योतिर्लिगांच्या विकास आराखड्यांची प्रभावी आणि वेगाने अंमलबजावणी व्हावी, यासाठी पाच वरिष्ठ सनदी अधिकाऱ्यांची नियुक्ती करण्यात आली आहे. ज्योतिर्लिंगांच्या विकास आराखड्यांतील कामांचा नियमितपणे आढावा घेऊन, त्याबाबतचा अहवाल सादर करा, असे निर्देश मुख्यमंत्री देवेंद्र फडणवीस यांनी दिले आहेत.
राज्यातील पाच ज्योतिर्लिंगांचा विकास करण्यासाठी आराखडे तयार करण्यात आले आहेत. या आराखड्यांची अंमलबजावणी वेळेत आणि दर्जेदार पद्धतीने व्हावी या करिता या अधिकाऱ्यांची नियुक्ती करण्यात आली आहे.
पाच ज्योतिर्लिंगांच्या तीर्थक्षेत्र विकास आराखड्यांना उच्चाधिकारी समित्यांच्या बैठकांमध्ये मंजुरी देण्यात आली आहे. त्यानुसार वेळोवेळी शासन निर्णय देखील काढण्यात आले आहेत.
त्यानुसार श्री. क्षेत्र भीमाशंकर तीर्थक्षेत्र विकास आराखड्यातील १४८ कोटी ३७ लाख रुपयांच्या सुमारे ११ कामांना मंजुरी देण्यात आली आहे. श्रीक्षेत्र घृष्णेश्र्वर तीर्थक्षेत्र विकास आराखडा १५६ कोटी ६३ लाख रुपयांचा आहे. श्री श्रेत्र त्र्यंबकेश्वर विकास आराखड्यातील २७५ कोटी रुपयांच्या कामांना मंजुरी देण्यात आली आहे. श्री क्षेत्र औंढा नागनाथ तीर्थक्षेत्र विकास आराखडा १५ कोटी २१ लाख रुपयांचा आहे. तर श्री श्रेत्र परळी वैजनाथ तीर्थक्षेत्र विकास आराखड्यातील २८६ कोटी ६८ लाख रुपयांच्या ९२ कामांना मंजुरी देण्यात आली आहे.
अंमलबजावणीसाठी सनदी अधिकाऱ्यांची नियुक्ती
श्री क्षेत्र भीमाशंकर (जि.पुणे) ज्योतिर्लिंगाच्या विकास आराखड्याच्या अंमलबजावणीसाठी सामान्य प्रशासन विभागाच्या अतिरिक्त मुख्य सचिव व्ही. राधा, श्री क्षेत्र घृष्णेश्र्वर (जि. छत्रपती संभाजीनगर) ज्योतिर्लिंगासाठी उच्च व तंत्र शिक्षण विभागाचे अतिरिक्त मुख्य सचिव बी. वेणुगोपाल रेड्डी, श्री क्षेत्र त्र्यंबकेश्वरसाठी (जि. नाशिक) वित्त विभागाचे प्रधान सचिव सौरभ विजय, श्री क्षेत्र औंढा नागनाथसाठी (जि. हिंगोली) वित्त विभागाच्या प्रधान सचिव रिचा बागला, श्री क्षेत्र परळी वैजनाथ (जि. बीड) ज्योतिर्लिंगाच्या विकास आराखड्याच्या अंमलबजावणीसाठी इतर मागास बहुजन कल्याण विभागाचे सचिव आप्पासाहेब धुळाज या अधिकाऱ्यांची नियुक्ती करण्यात आली आहे.
