मुंबई : विधान परिषदेच्या रिक्त झालेल्या पाच जागांवर महायुतीने आपले उमेदवार जाहीर केले आहेत. पाचपैकी तीन जागांवर भाजप, प्रत्येकी एक एक जागेवर अजित पवार यांच्या राष्ट्रवादीचा तर एकनाथ शिंदे यांच्या शिवसेनेच्या एका उमेदवाराला संधी मिळाली आहे. संदीप जोशी, संजय केनेकर आणि दादाराव केचे यांना भाजपने संधी दिली असून राष्ट्रवादी काँग्रेस अजित पवार पक्षाने संजय खोडके यांना उमेदवारी दिली आहे, तर एकनाथ शिंदे यांच्या शिवसेनेच्या वतीने नंदुरबार येथील चंद्रकांत रघुवंशी यांना उमेदवारी दिली आहे. दरम्यान, पाच जागांसाठी मविआने उमेदवार रिंगणात उतरवला नसल्याने पाचही उमेदवारांची विधान परिषदेवर बिनविरोध निवड होण्याचा मार्ग मोकळा झाला आहे.
विधान परिषदेच्या रिक्त झालेल्या पाचपैकी तीन जागांवर संदीप जोशी, संजय केनेकर आणि दादाराव केचे यांना उमेदवारी दिली आहे. विशेष म्हणजे भाजपच्या केंद्रीय नेतृत्वाने ही तिघांच्या नावावर शिक्कामोर्तब केले आहे. पाच पैकी तीन जागा भाजपच्या वाट्याला आल्याने राष्ट्रवादी काँग्रेस अजित पवार व एकनाथ शिंदे यांच्या शिवसेनेने उर्वरित दोन जागांवर आपले उमेदवार जाहीर केले आहेत.
नंदुरबार येथील चंद्रकांत रघुवंशी यांना एकनाथ शिंदे यांनी उमेदवारी जाहीर केली. तर विधानपरिषदेसाठी राष्ट्रवादी काँग्रेसकडून संजय खोडके यांना उमेदवारी जाहीर केली आहे.
संजय खोडके यांनी उपमुख्यमंत्री अजित पवार, भाजपचे प्रदेशाध्यक्ष चंद्रशेखर बावनकुळे, राष्ट्रवादी काँग्रेसचे प्रदेशाध्यक्ष सुनील तटकरे, ज्येष्ठ नेते छगन भुजबळ, माजी मंत्री दिलीप वळसे पाटील, माजी मंत्री अनिल भाईदास पाटील यांच्या उपस्थितीत उमेदवारी अर्ज दाखल केला.
