मुंबई : वाहनांना हाय सिक्युरिटी रजिस्ट्रेशन प्लेट (एचएसआरपी) बसविण्यात दिरंगाई होत असल्याने राज्याचे परिवहन आयुक्त राजेश नार्वेकर यांनी राज्यातील २७ प्रादेशिक परिवहन कार्यालयांच्या (आरटीओ) प्रमुखांना कारणे दाखवा नोटीस बजावली आहे, अशी माहिती अधिकाऱ्यांनी गुरुवारी दिली.
१ एप्रिल २०१९ पूर्वी नोंदणी झालेल्या ५० टक्क्यांहून अधिक वाहनांना अद्याप एचएसआरपी बसवल्या नाहीत, याकडे नोटिसांमधून लक्ष वेधले आहे. या प्लेट बसवण्यात अपेक्षित प्रगती का साधता आली नाही, याचे स्पष्टीकरण आरटीओ प्रमुखांकडून मागवले आहे. नोटीस मिळाल्यापासून सात दिवसांत उत्तर सादर करण्याचे निर्देश अधिकाऱ्यांना देण्यात आले आहेत.
निर्धारित मुदतीत स्पष्टीकरण न मिळाल्यास किंवा ते असमाधानकारक आढळले, तर नियमानुसार पुढील कारवाई प्रस्तावित केली जाईल. परिवहन आयुक्तांनी जुलैपासून आतापर्यंत एचएसआरपी बसविण्याच्या कामाचा तीन वेळा आढावा घेतला आहे.
राज्य सरकारने डिसेंबर २०१४ पासून १ एप्रिल २०१९ नंतर नोंदणी झालेल्या सर्व वाहनांसाठी एचएसआरपी अनिवार्य केली आहे. निविदा प्रक्रिया पूर्ण केल्यानंतर या प्लेट बसविण्याचे काम विविध कंपन्यांना देण्यात आले आहे.
७ ऑक्टोबर रोजी महाराष्ट्राचे परिवहन मंत्री प्रताप सरनाईक यांनी १ एप्रिल २०१९ पूर्वी नोंदणी झालेल्या वाहनांना एचएसआरपी बसविण्याच्या कामाचा आढावा घेण्यासाठी बैठक घेतली होती. यात सुमारे २५ ते ३० कार्यालयांमध्ये ५० टक्क्यांपेक्षा कमी वाहनांना एचएसआरपी बसविण्यात आल्याचे निदर्शनास आले.
याबद्दल मंत्र्यांनी तीव्र नाराजी व्यक्त केली आणि संबंधित अधिकाऱ्यांकडून कामातील दिरंगाईबाबत स्पष्टीकरण मागविण्याचे निर्देश दिले, असे नोटिसांमध्ये नमूद करण्यात आले आहे.
मंत्रालयातील वरिष्ठ स्तरावरून दिलेल्या निर्देशांची अंमलबजावणी करण्यात कसूर झाल्याचे प्रथमदर्शनी दिसून येत असल्याचेही नोटिसांमध्ये नमूद आहे. कामावर प्रभावी नियंत्रण व देखरेख ठेवणे आणि निर्धारित उद्दिष्टे साध्य करणे या अधिकाऱ्यांच्या जबाबदाऱ्यांचीही त्यांना आठवण करून देण्यात आली आहे.
एचएसआरपी प्लेट सुरक्षेसाठी महत्त्वाच्या
एचएसआरपी प्लेट ॲल्युमिनियम मिश्रधातूपासून तयार केल्या जातात. त्यावर ‘इंडिया’ असे लिहिलेली प्रकाश परावर्तित करणारी फिल्म, क्रोमियमयुक्त अशोकचक्राचे होलोग्राम, निळ्या रंगातील ‘आयएनडी’ ही अक्षरे आणि लेझरद्वारे कोरलेला १० अंकी विशिष्ट अनुक्रमांक असतो. त्यामुळे या प्लेटमध्ये छेडछाड करणे कठीण होते.