मुंबई : राज्य सामाईक प्रवेश परीक्षा कक्षाने (सीईटी कक्ष) वैद्यकीय व दंत अभ्यासक्रमाच्या वेळापत्रकात बदल केला आहे. त्यानुसार विद्यार्थ्यांना ८ ऑगस्टपासून महाविद्यालयांचा पसंतीक्रम भरता येणार आहे. वैद्यकीय अभ्यासक्रमासाठी सुमारे ६४ हजार विद्यार्थ्यांनी प्रवेश अर्ज नोंदणी केली आहे.
नीट यूजी २०२५ परीक्षेचा निकाल १४ जून रोजी जाहीर झाला होता. यानंतर वैद्यकीय समुपदेशन समितीने (एमसीसी) अखिल भारतीय कोट्याचे वेळापत्रक उशिरा जाहीर करत राज्य कोट्यातील प्रवेश प्रक्रिया राबविण्यासंदर्भातही सूचना दिल्या होत्या. त्यानुसार सीईटी कक्षाने राज्य कोट्यांतर्गत एमबीबीएस, बीडीएस, बीएएमएस, बीएचएमएस, बीयूएमएस, बीएनवायएस, बीपीटीएच, बीओटीएच, बीएएसएलपी या अभ्यासक्रमासाठी नोंदणी प्रक्रिया सुरू केली. एमसीसीच्या वेळापत्रकानुसार ६ ऑगस्ट रोजी सीईटी कक्षाने अंतरिम गुणवत्ता यादी जाहीर केली. याच दरम्यान एमसीसीने महाविद्यालयांचा पसंतीक्रम भरण्याच्या प्रक्रियेत बदल केल्याने सीईटी कक्षानेही राज्यातील प्रवेशाच्या वेळेत बदल केला. सुधारित वेळापत्रकानुसार वैद्यकीय व दंत अभ्यासक्रमासाठी विद्यार्थ्यांना ८ ते ११ ऑगस्ट या कालावधीत महाविद्यालयांचा पसंतीक्रम भरता येणार आहे. तर पहिली गुणवत्ता यादी १३ ऑगस्ट रोजी जाहीर करण्यात येईल. तसेच १४ ते २२ ऑगस्ट रोजी सायंकाळी ५.३० वाजेपर्यंत विद्यार्थ्यांना महाविद्यालयात जाऊन प्रवेश घ्यावा लागेल.
दंत पदवी अभ्यासक्रमांच्या ५० जागा वाढल्या
राज्यात ६४ वैद्यकीय महाविद्यालये आहेत. यामध्ये ८ हजार १४१ जागा उपलब्ध असून यामध्ये शासकीय ३६ महाविद्यालये व पाच शासकीय अनुदानित महाविद्यालये असून, खासगी २३ महाविद्यालये आहेत. शासकीय व अनुदानित महाविद्यालयांमध्ये ४ हजार ९२१ जागा आहेत, तर खासगी महाविद्यालयांमध्ये ३ हजार २२० इतक्या जागा आहेत. या जागांमध्ये यंदा कोणतीही वाढ झालेली नाही. त्याचप्रमाणे दंत अभ्यासक्रमाच्या गतवर्षी २९ महाविद्यालयांमध्ये २ हजार ६७५ जागा होत्या. यामध्ये चार शासकीय महाविद्यालयांमध्ये २७५, तर २५ खासगी दंत महाविद्यालयांमध्ये २४०० जागा होत्या. यंदा राज्य सरकारने जळगावमध्ये नवीन दंत महाविद्यालय सुरू केले आहे. या महाविद्यालयामुळे ५० जागा वाढल्या आहेत.
