मुंबई : गणेशोत्सवानिमित्त मुंबईतून कोकणात जाणाऱ्या चाकरमान्यांसाठी मंत्री नितेश राणे यांची ९ आणि ११ सप्टेंबरला 'मोदी एक्स्प्रेस' धावणार आहे. १४ वर्षांपासून गेल्या गणेशोत्सवाच्या काळात चाकरमान्यांना गावाकडे घेऊन जाणाऱ्या या विशेष रेल्वेची या वर्षीची तयारी पूर्ण झाली आहे. ९ आणि ११ सप्टेंबरला दादर येथील प्लॅटफॉर्म क्रमांक १४ वरून सकाळी १०.३० वाजता 'मोदी एक्स्प्रेस' कोकणाच्या दिशेने रवाना होणार असल्याची घोषणा मत्स्यव्यवसाय व बंदरे विकास मंत्री तथा सिंधुदुर्गचे पालकमंत्री नितेश राणे यांनी केली.
गणेशोत्सवासाठी गावाकडे जाणाऱ्या चाकरमान्यांना प्रवासात खाण्यापिण्याची इतर सुविधा उपलब्ध करून दिल्या जातील. बुकिंगसाठी २ ते ५ सप्टेंबर या कालावधीत संबंधित भाजप मंडल अध्यक्ष यांच्याशी संपर्क साधण्याचे आवाहन राणे यांनी केले. कणकवली-देवगड-वैभववाडी मतदारसंघातील चाकरमान्यांनी भाजप मंडलाध्यक्षांशी तर रत्नागिरी प्रवाशांनी भाजप जिल्हाध्यक्ष प्रशांत यादव यांच्याशी संपर्क साधावा, असे त्यांनी सांगितले.
चाकरमान्यांची हक्काची गाडी !
गेल्या १४ वर्षांपासून गणेशोत्सवाच्या निमित्ताने 'मोदी एक्स्प्रेस'च्या माध्यमातून चाकरमान्यांना गावाकडे घेऊन जात आहोत. दरवर्षी प्रवाशांच्या चेहऱ्यावरचा आनंद आणि समाधान पाहून मनापासून समाधान वाटते. यंदाही नाचत-गाजत आपल्या गावाकडे जाण्यासाठी 'मोदी एक्स्प्रेस' सज्ज आहे. आपली हक्काची मोदी एक्स्प्रेस पकडा आणि गणपती बाप्पाच्या स्वागतासाठी गावाकडे जाऊ या, असे आवाहनही मंत्री राणे यांनी केले आहे.
