पुणे : महाराष्ट्र लोकसेवा आयोगाच्या (एमपीएससी) अध्यक्षांच्या राजीनाम्याच्या मागणीसाठी आमदार रोहित पवार यांच्या नेतृत्वाखाली २७ सप्टेंबर रोजीच्या आंदोलनाला पुणे पोलिसांनी परवानगी नाकारली आहे. शहरातील कायदा व सुव्यवस्था, सार्वजनिक शांतता कायम ठेवण्यासाठी हा निर्णय घेण्यात आल्याचे सांगितले.
पवार यांनी विद्यार्थ्यांसह एमपीएससी अध्यक्षांच्या राजीनाम्याच्या मागणीसाठी आंदोलनाची घोषणा केली होती. सुरुवातीला २६ सप्टेंबर रोजी आंदोलन करण्याचे नियोजन होते. मात्र, गणेश विसर्जनाच्या पार्श्वभूमीवर पोलिसांवरील बंदोबस्ताचा ताण लक्षात घेऊन आंदोलनाची तारीख २७ सप्टेंबर करण्यात आली.
