मुंबई : महाराष्ट्र राज्य मार्ग परिवहन महामंडळाच्या (एसटी) ‘पॅकेज टूर’ उपक्रमाने अवघ्या सहा महिन्यांत उत्पन्नाचा नवा इतिहास रचला आहे. एप्रिल ते नोव्हेंबर या कालावधीत राज्यभरात तब्बल ४ हजार ३९ पॅकेज टूर यशस्वीरीत्या पूर्ण करण्यात आले आहेत. या कालावधीत एसटीच्या बसने सुमारे २६.९७ लाख किलोमीटरचा प्रवास करत तब्बल १९ कोटी २४ लाखांचे उत्पन्न मिळवले आहे.
तोट्यात असलेल्या एसटी महामंडळाला उर्जितावस्था प्राप्त करण्यासाठी महामंडळ विविध योजना राबवत आहे. त्यानुसार मंडळाने नागरिकांना प्रवासासोबतच पर्यटनाचा आनंद देण्यासाठी 'पॅकेज टूर’ उपक्रम सुरू केला आहे. याला उत्स्फूर्त प्रतिसाद दिला आहे. या पॅकेज टूर सेवेमुळे एकीकडे राज्यातील पर्यटनाला मोठी चालना मिळाली असून दुसरीकडे एसटी महामंडळाच्या उत्पन्नात लक्षणीय वाढ झाली आहे.
मराठवाडा, विदर्भात सर्वाधिक प्रतिसाद
मराठवाड्यातील नांदेड, लातूर, परभणी, धाराशिव व जालना, तसेच विदर्भातील नागपूर, भंडारा, गडचिरोली, वर्धा, अमरावती, बुलडाणा, चंद्रपूर, अकोला व यवतमाळ या विभागांमध्येही पॅकेज टूरला उत्स्फूर्त प्रतिसाद लाभला आहे.
विभागांची कामगिरी
उपक्रमात सांगली विभागाने ५८१ टूरसह अव्वल स्थान पटकावले आहे तर कोल्हापूर विभाग ५६१, सातारा ३९१, अहिल्यानगर ३६२ आणि पुणे विभागात २८८ पॅकेज टूर आयोजित केल्या.
महसुलाची कामगिरी
महसूलामध्ये कोल्हापूर विभागाने ३.२५ कोटींच्या उत्पन्नासह बाजी मारली तर अहिल्यानगर २.४५ कोटी, सांगली २.३५ कोटी, सातारा २.११ कोटी आणि पुणे १.३६ कोटी या विभागांनीही भरघोस महसूल मिळवला.
