नाशिक : खासदारांच्या पक्षांतराच्या चर्चांनंतर आता नाशिक महापालिकेतील शिवसेना (उद्धव बाळासाहेब ठाकरे) गटाच्या डझनभर नगरसेवकांच्या संभाव्य पक्षांतराच्या चर्चांनी राजकीय वर्तुळात खळबळ उडवली आहे. हे नगरसेवक मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याच्या तयारीत असल्याचा दावा केला जात असला, तरी या वृत्ताला उबाठा गटाकडून स्पष्टपणे फेटाळण्यात आले आहे.
राजकीय वर्तुळात सुरू असलेल्या चर्चेनुसार, प्रभागनिहाय विकासनिधीच्या माध्यमातून काही नगरसेवकांना आपल्या बाजूने वळविण्याची रणनीती आखण्यात आल्याचे बोलले जात आहे. या संपूर्ण घडामोडींविषयी कमालीची गोपनीयता पाळली जात असून, भविष्यात या चर्चांना प्रत्यक्ष स्वरूप आल्यास ते उद्धव ठाकरे यांच्या नेतृत्वाखालील शिवसेना (उबाठा) गटासाठी मोठा राजकीय धक्का ठरू शकतो, अशी चर्चा आहे.
नाशिक महापालिका निवडणुकीत शिवसेना (उबाठा) गटाचे १५ नगरसेवक निवडून आले होते.
सध्या महापालिकेत भाजप आणि शिवसेना (शिंदे गट) यांची संयुक्त सत्ता आहे. विकासकामांसाठी अपेक्षित निधी उपलब्ध होत नसल्यामुळे काही नगरसेवकांमध्ये नाराजी असल्याचे सांगितले जात आहे. याच पार्श्वभूमीवर काही नगरसेवकांशी संपर्क साधून त्यांना पक्षात आणण्याचे प्रयत्न सुरू असल्याचा दावा केला जात आहे. सूत्रांच्या माहितीनुसार, संभाव्य पक्षप्रवेशाबाबत शिवसेनेतील काही वरिष्ठ नेत्यांसोबत बैठका झाल्याच्याही चर्चा आहेत. मात्र, या दाव्यांना कोणतीही अधिकृत पुष्टी मिळालेली नाही. संबंधित नगरसेवक किंवा शिवसेनेच्या वरिष्ठ नेत्यांकडूनही याबाबत अधिकृत भूमिका जाहीर करण्यात आलेली नाही. यामुळे नाशिकच्या राजकीय वर्तुळात ‘ऑपरेशन टायगर’च्या चर्चांना उधाण आले असले, तरी संबंधित पक्षांकडून अधिकृत दुजोरा मिळालेला नसल्याने या घडामोडींवर अद्यापही तर्क-वितर्क सुरू आहेत. शिंदे गटाकडूनही या चर्चांबाबत अधिकृत भूमिका जाहीर करण्यात आलेली नाही.
‘मातोश्री’शी निष्ठावान
शिवसेना (उद्धव बाळासाहेब ठाकरे) गटातील एका स्थानिक नेत्याने या सर्व चर्चा फेटाळून लावल्या आहेत. नगरसेवक पक्ष सोडण्याच्या वृत्तात कोणतेही तथ्य नसून केवळ संभ्रम निर्माण करण्यासाठी अशा अफवा पसरवल्या जात असल्याचा दावा त्यांनी केला. पक्षातील सर्व नगरसेवक एकत्र असून ‘मातोश्री’शी निष्ठावान असल्याचेही त्यांनी स्पष्ट केले.
