मालवण : मालवणमधील भाजपचे कार्यकर्ते विजय केनवडेकर यांच्या घरात बेकायदेशीरपणे घुसल्याप्रकरणी शिवसेना शिंदे गटाचे आमदार निलेश नारायण राणे यांच्यासह पाच जणांवर मालवण पोलीस ठाण्यात गुन्हा दाखल करण्यात आला आहे.
भाजपचे कार्यकर्ते विजय केनवडेकर यांनी आमदार निलेश राणेंविरोधात मालवण पोलीस ठाण्यात तक्रार दाखल केली होती. बेकायदेशीरपणे घरात घुसल्याप्रकरणी ही तक्रार दाखल करण्यात आली होती. त्यानुसार मालवण पोलीस स्थानकात १८९ (१) म्हणजे बेकायदेशीर जमाव, १८९ (२) म्हणजे सार्वजनिक शांतता भंग करणे, ३२९ (४) म्हणजे चोरीच्या उद्देशाने घरात प्रवेश करणे आणि ३५६ (२) म्हणजे मानहानी करणे या कलमान्वये गुन्हे दाखल करण्यात आले आहेत.
गुन्हा दाखल झाल्यानंतर निलेश राणे यांनी भाजपविरोधात दंड थोपटले आहेत. ते म्हणाले की, "माझ्यावर गुन्हा दाखल झाला, हे अपेक्षितच होते. मात्र ज्यांच्या घरात पैसे सापडले, त्यांना साधी नोटीसही देण्यात आलेली नाही. आम्ही गुन्हा पकडून दिला, हा आमचा गुन्हा झाला. ज्याने कॅमेरा पकडला होता, त्यालादेखील आरोपी करण्यात आले आहे. हे सर्व दबावाखाली सुरू आहे, हे स्पष्ट दिसतेय. तुमची लोकं काही केलं तरी त्यांना मोकाट सोडले जाते, सगळे अधिकार आहेत. चोरी करा, डाका टाका, पैसे उधळा, त्यांना सगळे अधिकार आहेत निवडणुकीत. अजून माझ्यावर दहा केसेस झाले तरी मी पुढचे तीन दिवस यांना सोडणार नाही. आता पोलीस मला अटक कधी करणार, याचीच वाट पाहतो."
यावेळी निलेश राणेंनी भाजप प्रदेशाध्यक्ष रवींद्र चव्हाण यांच्यावरही तोफ डागली. "रवींद्र चव्हाण यांच्या मार्गदर्शनाखाली हे सगळे चालू आहे. ते किती वेळाने कोणा-कोणाच्या नंबरवर फोन करत आहेत, त्यांचा पीए किती लोकांच्या संपर्कात आहे, हे सर्व मला माहिती आहे," अशा शब्दांतही त्यांनी चव्हाणांना सुनावले.
गेल्या काही दिवसांपासून मालवण नगरपालिका निवडणुकीत मोठे राजकीय नाट्य पाहायला मिळत आहे. या निवडणुकीच्या प्रचाराच्या काळात शिवसेना (शिंदे गट) आमदार निलेश राणे यांनी भाजपा पदाधिकारी विजय केनवडेकरांच्या घरावर धाड टाकली. यावेळी त्यांना लाखो रुपयांची रक्कम मिळाली. त्यामुळे ही रक्कम भाजपा प्रदेशाध्यक्ष रवींद्र चव्हाण यांच्याकडून आली असून ती मतादरांमध्ये वाटवण्यासाठी देण्यात आली असल्याचा आरोपही निलेश राणेंनी केला.
