लासलगाव : निफाड तालुक्यातील खडकमाळेगाव येथील प्रगतिशील शेतकरी संतू कचरू रायते (५७) यांनी आत्महत्या केली आहे.
नापिकी आणि वाढत्या कर्जबाजारीपणाला कंटाळून हे टोकाचे पाऊल उचलले. रायते यांच्या खिशात लासलगाव पोलिसांना एक आत्महत्यापूर्व चिठ्ठी सापडली आहे.
कर्जाचा डोंगर आणि शेतमालाला मिळणारा असमाधानकारक भाव यामुळेच आत्महत्या करत असून यासाठी कुटुंबीयांना दोषी धरू नये, असा उल्लेख या चिठ्ठीत असल्याचे पोलिसांनी सांगितले.
राज्य सरकारने दुष्काळग्रस्त तालुक्यांची यादी जाहीर केली. यात निफाड तालुक्यात भीषण दुष्काळसदृश परिस्थिती असताना प्रशासनाने जाहीर केलेल्या दुष्काळग्रस्त यादीतून तालुक्याला वगळण्यात आले. या निर्णयानंतर काही तास उलटत नाही तोच ही दुर्दैवी घटना घडल्याचे उघड झाले आहे.
